Nino Iralu-i NMYO office tasen semzüktsü

Kohima, February 26 (TYO): Deobarnü Nino Iralu-i New Market Youth Organization (NMYO) office building semzüktsüogo.
Taoba NMYO President aser Member -Secretary, Nagaland State Legal Service Authority(NSLSA), Nino-i tanü sentong nung o jembidang ashiba agi, state yimtiba nung tesem tajungtibaji New Market ya lir aser iba colony ya kanga dang junger.
Taoba mapangtem nung iba colony nungi wadang balala nung takotet nisungtem anitetogo, ta laisa ashi.
NMYO-i office ki tasen yangluba atema Nino-i tenüngsang agütsü aser lanur ketdangsertemi tanurtem anitettsü atema sentongtem ayongzüka agitsü laisa ayongzük.
Tanü lanurtemji tarutsü lennirtem lir aser lanur kati anogoshia mapa tajung inyaktettsü aser ibaji ajanga tangartem ajungmesotettsü, ta laisa shisem.
NMYO President, Sedevizo Nakhro-i tesentepertem pela agizüka o jembidang, NMYO indang ki ka yanglutetbaji pungmang ka asangsang nung atalokba ama lir, ta ashi.
Külen, NMYO Building committee Convenor, Apao Rhezhu-ia iba ki yangluba nung tenla agütsür ajak dang pelaba metetdaktsü.
Tanü UCRC Pastor, Zhabu Kuotsu-i ki meshiteta sarasademtsü aser sentong nung mendenji NMYO general secretary, Khriesavizo Rame liasü.