Nipah virus agi nisung 10 asüba sülen AIIMS team ka Kerala-i ogo

New Delhi, Monupii/May 23 (Agencies): Kerala nung Nipah virus agi nisung ter asüba sülen tanü Union Health Minister, JP Nadda-i iba tashidak wara nokdangtsü atema mera ajak agia inyakdar, ta metetdaktsü.
Tesüiba anogo ana tsüngda Karela nung iba tashidak agi nisung terbo süogo aser iba tashidak ya Maharashtra aser Goa ama state nunga prokshitsüa akok ta bilemer.
AIIMS aser National Centre for Disease Control nungi teams yoka Kerala nung mongdar aser Union Minister, Nadda-i parnok den maneni tongtepratepdar.
Tanep Nadda-i twitter ajanga, “Ni Kerala nung amonger Director NCDC aser AIIMS team naprong den tongtepratepa jembidar. Nipah virus amokmeren anema inyaktsü asoshi ni parnok nem tetuyuba agutsüogo. Ajak kümdanga alitsü aser olulu meproktsü ni ajak dang mepishir,” ta metetdaktsü.
Kerala nung aliba hospital ajak yakyaka lir aser lisopurtem dang iba tashidak indang temaitsütem metetra tekaraba nung osang metetdaktsütsü tuyuogo.
World Health Organisation (WHO)-i ashiba agi, Nipah virus ajanga nisung aser shiruru tekolok mejungi raksatsür aser iba tashidak indang tamaitsütem rongnung temang kanga metaba, tekolak menüba, anünüba aser mangmangba densema lir.
Goa nunga ketdangsertemi state nung iba tashidak meproktsü atema Kerala nungi Goa-u arur senzüsempongertem dak iba tashidak ali-mali tendangtsü atema metetdaktsüogo.
Taruba anogo ishika tsüngda Mumbai nunga iba tashidak proktsü südi ta aikati arendaka bilemdar.