NIPF-i PM Modi dangi shidi zülu

Dimapur, February 16, 2024 (TYO): Centre sorkari Free Movement Regime (FMR) agientsüba aser India-Myanmar arrtsü atsüdangtsü magizüker ta Nagaland Indigenous People’s Forum (NIPF)-i ashi.

Kanga dang ajungbena FMR agientsüba aser arrtsü Indo-Myanmar arrtsü atsüngdangtsü lemtetba ya tejashitsü osang ka lir ta NIPF-i Prime Minister dangi shidi ka züluogo.

Iba lemtet ya arrtsü anatsülen alirtem asoshi kanga majung lir. Iba tesem nung yimjung aser nübortem sünepa alitsü atema inyakba maparen nung iba lemtet ajanga tetsükdaktsü bentsür arutsü ta parnokisa ashi.

Tesüiba nung onok dang masüngdangtepi arrtsü ladanga külem nübortem linük balala nung alitsüsa tia ka ajuru. Iba ajanga ozü nübortemi timtem kanga ajuruogo aser alemli nungi libaliroa aruba nung tetsükdaktsü ajuru, ta NIPF-isa metetdaktsü.

Lisopurtemi yimjung aser telongjem asoshi inyakba mapa nung aser arrtsülen terenlok bener arutsü atema tanga lenmangtem bushitepa inyaktsü mepishir, ta parnokisa Prime Minister dangi shidi züluogo.

Hokolbarnü Dimapur nung India Myanmar arrtsü tebilemtsü atema symposium ka ayonga agidang NIPF-i northeast state pezü nungi Core Committee ka tentetogo.