Nirbhaya ken o nung aibelenertem südaktsütsü mapang atsülanger

New Delhi, March 02 (Agencies): Nirbhaya tashiyim amshia raksatsüba aser tepsetba ken o nung aija alir nisung pezüprong March 3, 2020 anogo nung tasüba temerenshi agütsütsü liasü saka Hombarnü Delhi court kati ano mapang atsülangogo.
Aija alir pezü rongnung Pawan Kumar Gupta-i Hombarnü linük Tir matsüngdang taochi meshia temepishiba agütsüba ken o Patiala House court-i angadanga liasü.
Additional Session Judge, Dharmender Rana-i iba ken o maneni angadangtsü atema anogo atsülangogo.
Hombarnep Additional session judge-i Pawan Kumar atema okatsür lawyer dang, kechiba temepishibaji menoa benok ta arrja liasü.
Hombarnepsa Supreme Court-i, Kumar-i benokba ‘curative plea’ magizük aser Delhi court-ia Pawan Kumar o Akshay Kumar Singh nati tasüba temerenshi sota atatsü mepishiba magizük.
Ajisüaka Pawan indang lawyer, A P Singh-i, pai taochi meshiba temepishi agütsüogo anungji tasüba temerenshi sota atatsüla, ta ashi.
Court-i Singh dang, “Nai mi den asayar, na kümdangtsüla, kechiyong langka danga aibelenra kecha ataloktsüar nai meteta lir,” ta ashi.
Iba ken o angadangba mapang nung Tihar jail ketdangsertemi, “Taochi meshiba temepishiba agütsüogo aser tangbo obendangertem shilem kecha mali, anungji sorkar court-i telemtetba agitsüla,” ta ashi.
Parnokisa, Tiri Tihar jail dang nungi Pawan-i taochi meshiba temepishiba indang osang meshitsü, aser tasüba temerenshi sota atatsü, ta metetdaktsü.
2012 küm December 16 aonung Delhi nung tebur telok kati bus ka nung arishi küm 23 physiotherapy student, Nirbhaya tashiyim amshia raksatsüba aser yirutsüba ajanga kasa ita nungsa Singapore nung treatment tagidak mapang asüba ken o nung tai tonglokja alir parnok trok liasü. Parnok trok rongnung kabo juvenile liasü, ka jail nung lia 2013 küm March ita nung asü aser tanüngba par pezü nem tasüba temerenshi obendang agüja lir.