Nirbhaya tepsetertemi tasüba temerenshi agientsü mepir

New Delhi, Monupii (May) 4 (Agencies): Luchii (December) 2012 nung nisung telok kati Delhi nung tetsür kaketshir ka bus gari ka nung tashiyim agi shi nung medemba aser reshikangshiba ajanga linük ajunga anokshidakja liasü. Parnok rongnung nisung pezüi Supreme Court dang tasüba temerenshi magütsütsü atema mepishiogo.
Tasüba temerenshi agütsübaji ‘Temeten agütsüba tenüng nung taochi mali tepsetba lir’ ta par pezüi ashi.
Tanü okadaki iba dak sendakba nung telemtetba kecha magi. Tanü iba ken o nung aija alir Vinay Kumar aser Pavan Kumar na nungi temepishiba angadanga liasü.
Tena lanur ang aser sensaker kibongtem nungi lir ta Vinay Kumar aser Pavan Kumar nati ashi saka public prosecutor-i tena anema noktak.
Tena atema okatsür AP Singh-i, “tena ya teti mapa tamajung inyakertem masü aser ozüng alema inyakba record kecha züluoka mali, anungji okadaki parnok taküm melenshitsü atema maongka agütsütsüla” ta ashi.
Linük aika nung tasüba temerenshi agienogo. Tasüba jagi ozüng alema inyaksangshiba mapa saka nisung ang tepseter, ta AP Singh-isa ashi.
Ajisüaka, idangji Chief Justice of India Dipak Misra-i tasüba temerenshiji ozüng nung lateta lir ta langzü.
Parnok benokba onük ajakji Special Public Prosecutor Sidharth Luthra-i anema noktaka jembi.
Luchii (December) 16, 2012 nü arishi küm2 3 tain medical student tebur telok kati tashiyim agi shi nung medemer tepsetba atema India ajungalen nisungtem ain adok aser iba ajanga tetsür anema mapa inyakba indang ozüngtem yanglushi.
Iba ken o nung tai tongloktsür nisung 6 liasü saka parnok rongnung bus driver Ram Singh tepuokdak pa sasa alenset. Parnok rongnung tanubosangji arishi küm 18 ano majung liasü aser iba jagi pa juvenile home kati anir ao.
Lendong atalokba sülen tetsürlaji anogo 16 tashi mozü kidang anepalur asü aser la dang “Nirbhaya” ta tenüng jaloktsü.