Nirbhaya’er tsüraburtemi Rahul Gandhi ajurua party teyari meshi

New Delhi, December 22 (Agencies): 2012 küm December 16 nü tebur telok kati tashiyim amshia raksatsür tepsetba tetsürlar tsüraburtemi tanü Congress Pary tatong Tir, Rahul Gandhi ajurua Rajya Sabha nung Juvenile Justice Bill agizüktsü atema party-i pusemtsü mepishi.

Iba senden sülen tetsürla tetsü Asha Devi-i, tanü Rajya Sabha nung party-i iba Bill pusemtsü ta Rahul-i shiogo, ta metetdaktsü.

Tanep tetsürlar tsüraburtem Minister of State for Parliamentary Affairs, Mukhtar Abbas Naqvi’er kidangi oa pa ajuruogo. Naqvi ajuruba sülen parnoki, tanü Rajya Sabha nung iba bill agizüktsü ta shiogo, ta metetdaktsü.

Asha Devi-isa, item senden aika lemtepogo, ta ashi.

“Iba bill ya tanü agizüktsüla. Tanü iba bill agizüktsü ta kü dang shiogo. Iba bill agizüktsü atema onoki raraa arur,” ta laisa ashi.

Juvenile Justice Act yanglushiba nung- temzüng alema aibelen tulu ken o inyaker arishi küm 16 nungi 18 tsüsüngdapurtembo tain ama kasa züngshia ken o akatsü.

Iba bill ya Lok Sabha nungbo agizüka liasü aser Rajya Sabha nunga tanü agizükogo.

December 16, 2012 nü tebur telok kati paramedical kaketshir, Jyiti Singh tashiyim amshia raksatsü aser anogo ishika lir la asü, aser iba ken o nung nisung pongu den külemi juvenile ka (arishi küm 18 tekübok) densema aija liasü.