Nirmala Sitharaman Defence Minister tenangzükba agiogo

New Delhi, September 03, 2017: Deobarnü New Delhi, Rashtrapati Bhavan nung linük Tir, Ramnath Kobind-i ketdangsüa Nirmala Sitharaman Cabinet Minister (Union Defence Minister) inyaktsü atema tenangzükba agidaktsüba noksa nung angur. 

New Delhi, September 03 (Agencies): Deobarnü Ato kilonser, Narendra Modi-i aniba Union Cabinet nung Nirmala Sitharaman Union defence minister tenangzükba agiogo.
Iba dak sendakba nung osangbenertem den jembidang lai, la kanga pelar aser lai kanga bilema aliba langka agi lai linük tenzüktsü, ta metetdaktsü.
Sitharaman-isa, la nem cabinet minister jenjang agütsübaji party lenirtemi nungitba ajanga lir, ta ashi.
Iba ya khuret tulu ka lir, ta shia Sitharaman-i, Ato kilonser, Narendra Modi-i la dak tamang katetba atema pelar, ta ashi.
Kiralongra dak sendakba nung lai Pakistan den kanga tongtibangsüa inyaktsü asü? ta asüngdangba langzüdang lai, “Ni ano mapa magizükba, anungji iba tasüngdangba asoshi telangzüba agütsütsü mapang shidak masü. Kü nem mapang agüjang,” ta ashi. Defence Ministry repsema bena alisang, Arun Jaitley Japan linük nungi meyipa aruba sülen ang lai mapa agizüktsü.
La nem cabinet jenjang agütsüba ajanga Ato kilonseri tetsürtem nem tashi agütsüba temaitsü sayur asü?, ta asüngdangba langzüdang lai, Ato kilonseri teti tetsür atema bilemtsür, ta langzü.
“Pa Gujarat nung (Chief Minister) inyakba mapang nungi pa inyakyimji ni meteta liasü, pai teti agia tetsürtem nem tim shilem agütsür. Tetsürtemia inyaketttsü ta pai amanger,” ta Sitharaman-isa ashi.
Tanep cabinet menden angur junior minister pezü rongnung la densema lir. Iba jakdang la Minister of State (Independent Charge) Commerce inyaka liasü.
Tanü la tenangzükba agiba sülen osangbenertem den jembidang lai, “Jila tila ka nungi süaka party nung dena party bangdak lenirtemi iba tashi maongka agütsüra, ibajibo temoatsü ka lir. Aji mesüra tamakoktsü,” ta ashi.
La commerce minister inyakba mapang nung lai aitsüba dak sendakba nung tasüngdangba ka langzüdang lai, “Taitsüba ajak nungji tangatettsü lir, aser asenoki iba nungjagi angazüktsüla. Taitsüba ajanga ni mejashir mesüra metsübur, saka iba nungjagi tangazükba angur,” ta lai ashi.
Sitharaman-isa la Commerce minister inyakba mapang nung commerce ministry-i inyakba- Start up India aser Make in India indanga jembi.
“Ato kilonser teyari agia ministry-i Start up India aser Make in India densema aika inyakogo. ‘Make in India’ indang tangatetba tai aika lir, saka item atemaji telangzüba agütsütsü,” ta laisa shisem.