NISA aser ANPSA-i draft National Education Policy magizüker

Kohima, October 23 (TYO): Linük nung nija school tem nung draft National Education Policy (NEP) benokba magizüker ta National Independent Schools Alliance (NISA)-i Bodbarnü metetdaktsü.
“Iba draft NEP benokba ajanga sorkari nija school tem ketdangsüba nung teka aitsü aser linük nung shisaliok wadang nung inyakyim ajak melenshitsü” ta NISA president Dr Kulbhushan Sharma-i ashi.
All Nagaland Private Schools Association (ANPSA) indang 36 buba Annual General Body Meeting nung jembidang pai iba ya ashi.
NISA-i draft NEP anema noktaker kechiyong NEP ajanga school tem nung uniform language code, compulsory subject ka ama Sanskrit züngdaktsütsü aser local MLA tem dena School Management Committee (SMC) tenzüktsü lateta lir, ta Dr Sharma-isa ashi.
Kaketshirtemi oshi shimtsübaji sorkari masü saka tsüraburtemi shimtsüla. Ano, nija school tem nung local MLA tem dena SMC tentetba ajanga school principal dang züngsem ama adentsü aser school management agientsü, ta paisa shisem.
“SMC maparen tenzükra, ibaji schools management policy tem anema asütsü aser nija school tem nung politics aittsü” ta paisa ashi.
NEP ajanga tesayurtemi timtem ajurutsü kechiyong iba nung B. Ed teachers masürtem mesayudaktsütsü ta lateta lir, ta Dr Sharma-isa metetdaktsü.
School aikati sorkar nungi sen talila angutsü atema taila enrollment agütsür anungji iba ya azüoktsü atema Direct Benefit Transfer (DBT) scheme tenzüktsüla. Iba ajanga sorkari sen crore aika kümzüktsü. NISA-i draft National Education Policy anema post card campaign ka tenzükogo anungji Nagaland nung nija school temia iba nung shilem agitsü ayongzüker, ta paisa ashi.
Sentong nung ANPSA president Nini Sekhose-i NISA den yariteptsü ta ashi.
Nagaland nung lisopur kin 14 lir aser English dak alia tanga oshi kati sayutsüba tamakoktsü. Centre sorkari yangluba draft language policy tasen ya Nagaland nungbo magizüktsü, ta Nini-isa metetdaktsü.
Nagaland nung admission, monthly fees aser home tuition fees jenjang latettsü atema asüngdangdang “ANPSA-i iba ya azüoktsü tashi mali, aser tsüraburtemi parnok chirnurtem koba school nung züngdaktsünü’ar shimtsüsa akümtsü” ta Nini-i langzü.