Nisung 10266-i Kisama semdang

Dimapur, Luchii (December) 7 (TYO): 19 buba Hornbill Festival 2018 tenzüker anogo tenetbuba nung tourist 10266 aru, ta Directorate of Tourism-i metetdaktsü.
Tanü arurtem rongnung foreign 198, domestic 1935 aser local visitors 8133 liasü, ta parnokisa shisem.
Tanü sentong nung tongti tesemdangerji Minister of State, Tribal Affairs, Jaswanrsingh Bhabor aser chief host temji- Urban Development & Municipal Affairs Minister Metsubo Jamir aser Food& Civil Supplies & Legal Meteorology, NSDMA Advisor Pukhai na liasü.
Jaswanrsingh Bhabor-i o jembidang Nagaland semdangba aser Naga nunger sobaliba takar anguba atema pelaba metetdaktsü.
Nagaland ya India kübok shilem ka asüba atema pelar aser India nung lisopur teimba aliba state rongnung ka lir. Prime Minister, Modi-i India nung sobaliba aika aliba ajiteta 2016 küm Delhi nung tribal carnival ayongzük, ta pai ashi.
Sentong nung o jembitsü atema tetushi süa jaokerji Lt.Gen Sukhdep Sangwar, Assam Rifles liasü aser pai ashiba agi, “Hornbill Festival ya küm shia tajungba küma aoer.”
Nagaland nung alirtem ya tasü tait dang, temulung tulu, sobaliba, yimya khenyongi balaka lir.”
Tanü sobaliba sentong nung Chakhesang nungeri ‘Thebvo Do’ ta ser ang yangluba ia sayu aser Khiamniungan nungertemi ‘Leh-Leh’ ta ser alu aroba ia sayu.
Maneni, Chang nungertemi ‘Manghapbu Chia’ ta ser mangyimba ken ka aser Kuki nungeri ‘Sim Lokoila’ sobaliba ken aten.
Garo nungertemi ‘Jaktongsika’ ta ser sobaliba saisapong sayu aser Aortemi ‘Go-Karting’ saisapong sayu.
Tatemsa, Konyak nungertemi ‘Zansingbu Zanglan’ ta ser tsüngsang ai aser Phom nungertemi Hornbill benjung nem tetushi agüja ‘Oohang Moo Menvih-ei Yahpu’ ta ser ken aten.