Nisung 2 tepsetba ken o ‘fast track court’ nung angadangtsü

Guwahati, Aami (June) 15 (Agencies): Karbi Anglong nung nisung ana tepsetba ken o fast track court ka nung angadangtsü ta Assam Chief Minister Sarbananda Sonowal-i ashi.
Guwahati nungi lanur ana tepsetba ken o nisung kari yimten ken o ka kümdaktsünür saka sorkari ibaji matalokdaktsütsü ta chief minister-isa ashi.
“Tarutsü nung tatishitsü ka ama asütsü atema tekaratiba nung aibelenertem merenshitsü. Assam nung alirtemi ibaji aginür anungji onoki iba ken o fast track court ka nung angadangtsü atema temulung agütsütsü” ta Sonowal-i osangbener dang ashi.
Taoba Hokolbarnü Karbi Anglong district kübok Panjuri tesem nung Nilotpal Das (29) aser Abhijeet Nath (30) na tanur apurtem ta temulung melemi bilema nisung telok kati zükset.
Iba tatalokba nung tongti süa tai tongloktsüsang den nisung aika puogo aser ano maneni aibelenertem aputsü ta Assam Chief Minister-isa metetdaktsü.
Assam nungertemi tejakleni arutsüla aser loktiliba nung meinprongba maparen agientsü atema sorkar den yariteptsüla ta paisa ayongzük.
Tang tashi nung iba dak sendakba nung nisung 63 tashi puogo.
Taoba mapang nisung tepsetba ken o ka atema bail nung chioka alisang aser tawa nisung züksetba nung tongti süa tai tongloktsüsang Alfajoz Timung police-i pua lir.
Timung-i Nilotpal aser Abhijeet na den mangatettep adoka raratep aser iba sülen pai tenaji tanur apurtem ta olulu prokshiba ajanga yimdaklirtemi tejashi nung tena pur zükset, ta Director General of Police Kuladhar Saikia-ia osangbener dang ashi.