Nisung 21,000-i black money cr. 4,900 sangdong: IT

New Delhi, September 07 (Agencies): Sorkar indang Pradhan Mantri Garib Kalyan Yojna (PMGKY) kübok nisung 21,000-i black money crore 4,900 sangdongogo, ta Briohostibarnü sorkar ketdangser kati metetdaktsü.

Demonetisation sülen sorkari taochi mapang agütsüba mapang nung parnoki ochimashi sen rizünga alibaji sangdong, ta ketdangserisa ashi.

Income Tax Department nung tongti ketdangser kati, “PMGKY scheme kübok nisung 21,000-i black money crore 4,900 sangdong, aser iba nungjagi tang tashi nung sorkari saru crore 2,451 sarutetogo. PMGKY scheme ya taküm March 31 nü tashi liasü,” ta metetdaktsü.

Yaküm November 8 nü Ato kilonser, Narendra Modi-i demonetization sangdongba sülen sorkari ochimashi sen rizünga alirtemi saru den senchi shilem 50 agütsüba ajanga sen melentettsü atema maongka agütsütsü asoshi December ita nung iba scheme ya tenzüka liasü; iba maongkaji taküm March 31 nü tashi dang agütsü.

PMGKY scheme anenba sülen Revenue Secretary, Hasmukh Adhia-i, iba scheme ya kanga jungabo takok mangu, ta shia liasü.

Union Finance Minister, Arun Jaitley-i PMGKY sülen iba mesükba scheme kar benoka liasü.

PMGKY scheme anenba sülen Income Declaration Scheme (IDS) June 1, 2016 nungi September 30, 2016 tashi benok, aser tang tashi nung nisung 71,726-i ochimashi sen crore 67,382 sangdongogo.

Sorkari IDS kübok tang tashi nung saru crore 12,700 sarutetogo.