Nisung 29 amenba AN-32 tayimtsü samar bushir

Chennai/New Delhi, July 22 (Agencies):  Hokolbarnü Indian Air Force (IAF) indang AN-32 tayimtsü ka nung ketdangser pezü densema nisung 29 mener Chennai nungi Port Blair-i aoba mapang Bay of Bengal nung samaogo.
Iba sülen IAF, Navy aser Coast Guard-i tzü telung nung senzüba rong ka, tayimtsü 8 aser rong 13 amshia samaba tayimtsüji bushi tenzükogo.
Tambaram air base nungi iba tayimtsü apusoba sülen minute 16 sülen tanep 8:46 ako nung radio ajanga tesüsabuba tongtepratepa liasü.
Tanü nikongdang Union Defence Minister, Manohar Parrikar-i, “Tayimtsüji tang tashi menguteter. Iba tayimtsü aser tayimtsü nung mena alirtem angutsü atema akokba tashi meranga inyakdar,” ta metetdaktsü.
Tayimtsü nung alir parnok 29 rongnung pilot ana den navigator ka densema crew züngsem trok, ketdangser ka densema IAF sepai 11, Army ana, Coast Guard nungi ka aser navy nungi parnok 9 lir.
“Tayimtsüji tanep 8:30 ako nung Tambaram nungi apuso aser ibaji tanü 11:30 ako meta Port Blair atongtsüba liasü,” ta IAF otongdar Wing Commander, Anupam Banerjee-i ashi.
Defence osang ajanga ashiba agi, tesüsabuba tongtepratepdang iba tayimtsüji anünglen feet 23,000 shi tur liasü.
Iba tayimtsü nung khen totzü inokba agi ghonda pezü dang yimteter.
Navy otongdar, Captain DK Sharma-i, “Bay of Bengal nung tayimtsü samaba bushitsü aser mena alirtem kümzüktsü atema Navy temi maparen tenzükogo,” ta metetdaktsü.
Russia nung yangluba kol ana keta aliba AN-32 tayimtsüji Ukraine nung tajungba küma yanglushia liasü. IAF ket nung AN-32 tayimtsü 100 dak tema lir. Tan ita iba tayimtsü nung timtem tilateri kar liasüba osang lir.
AN-32 tayimtsü tesüsabuba tsüokokbaji 2009 küm liasü. Iba tayimtsüji Arunachal Pradesh nung Machuka advanced landing ground (ALG) nungi apusoli tsükoka liasü.
AN-32 tayimtsü indang ‘flight safety record’ tajung lir. Iba tayimtsü tesüsabuba kanga mejungi tsükokbaji 1999 küm Delhi nung tsükok, aser iba lendong nung nisung 21 asü.