Nisung 300 Hindu yimsü dangi tanaben meyip

Varanasi, October 12 (Agencies) : Varanasi nungi kilometer 16 shi pilar aliba Ausanpur yimtsüng nung ‘ghar wapsi’ tesüsabuba atalokogo.
Iba yimtsüng nung nisung 300 shi Hindu yimsüi tanaben meyip. Küm ishika tejaklen iba tesem nung tenla ki ka yanglu aser nisungtemji iba tenla kidang külem ya liasü, ta The Times of India nung osang ka ajanga metetdaktsü.
Dharma Jagran Samanvya Samiti ta ajaba telok kati item tamangertemji tanaben Hindu yimsü dangi meyipdaktsü.
Hindu yimsü agizükba sülen parnok ajak nem Gita aser Hamuman Chalisa ka ka agütsü, ta osang ajangasa metetdaktsü.
Iba yimtsüng nung alir kati ashiba agi, tang Hindu tamangba yimsü dangi tanaben meyipertem jagi kodanga Hindu yimsü metoktsü.
Parnok SC jenjang nungi tajangzüktem mangutsü ta tsübua bilemba agi parnoki tamangba yimsübo metoktsü saka tamang dang melenshi, paisa ashi.
Ausanpur yimtsüng ya Prime Minister Narendra Modi’er constituency nung lir aser iba ken o adokba sülen police-i of sentong ayongba luden nung convenor puogo.Darma Jagran Samanvya Samiti (DJSV) Kashi Prant-i züluba shidi ka den ano ‘shuddhikaran’ (merüktetba) külemküjaba noksa ka Varanasi nung kanga bulua belenshiba sülen police-i iba sentong ayongertem bushitsü tenzük.
Gram Devta Pujan Samiti convener, Chandram Bind-i züluba shidi nungji kibong 38 nungi züngsem 315-i Sanatan Dharma nungi pila ao saka parnok tanaben tetsü-tebou nunger tamangba yimsü dangi meyipa arnir aruogo, ta zülua lir.
Iba shidi nungji yimdaklirtem jagi koba tamangba yimsü amanga liasü’ar shia mali, saka parnok ket nungi bendanger tamangba kakettem meyipa meshi aser Gita o Hanuman Chalisa amoktsü ta shia lir.
Deobarnü osangbenertem yimtsüng tonga oa asüngdangya asüdang, tang Hindu yimsüi meyipertemji anameta aliba tenla ki ka nung oa külemya liasü, ta ashi.