Nisung 39 nem tasüba temerenshi agütsür

Dhaka, Metsüremi 13 (Agencies) : Bangladesh nung küm pezü tejaklen party lenir ka tepsetba atema lima Awami League nung inyaker parnok semer teku nem tasüba agi merenshitsü atema tanü Sangtennü linük anüolentip tsütsü aliba court kati obendang agütsüogo.
2014 küm May 20 anüngdang upazila Awami League tir, Ekramul Haque-ji Feni yimti Academy area nung lia nisung telok kati nok agi yirutsü, injang agia aka aser ano mesüi taküm lia pa gari telung nung shibanga yur par gari nungji mi senoktsü.
“Iba tashiyim maparen nung ajemdaker nisung 39 nem tasüba temerenshiagütsür,” ta Feni yimti nungi PTI osang den telephone ajanga jembidang ketdangser kati metetdaktsü.
Paisa ashiba agi, “Aibelenertem ajakji Awami League purtem dang lir aser tanishirtema karbo densema lir.”
Yakbang ser inyak ta mezüngbo temulung malem bilema liaka opposition BNP telok nung lenir ka densema par ter trokbo aibelena maliasü ta court-i jangjaogo.
Iba dak sendakba nung ajak agi nisung 44 pua asüngdangyaogo aser par ter troki aibelenbaji court dang nangzüka ashi.