Nisung 4 soseta asüba ken o nung tai tongloktsür police ket nung ayutsü

Guwahati, September 25 (Agencies) : Kamrup (Metro) court nung CJM-i Honibarnü Pulin Gogoi police ket nung ayutsü atema tetuyuba agütsü.
Taoba Bodbarnü Guwahati nung aliba hotel ka nung kinü tanur ka dena nisung pezü tasümang anguba dak sendakba nung tai tonglokja police-i Pulin apu.
Police-i pa hopta ana parnok ket nung ayutsü asüngdang saka okadaki anogo pungunü dang ayutsü oshidang agütsü.
Hokolbarnü police-i Pulin ya Dibrugarh district kübok Pathalibam Dehingia yimtsüng nung apu.
Prasanta Kumar den külemi pai mapa agütsütsü ta ser nisung külakoktsüba maparen ka inyak. Iba maparen nung Pulin-i Prasant ashioktsü aser iba jagi Prasant sensak tia ajurua par kibong soseta asü, ta police-i tai tongloktsür.
Ajisüaka, Pulin-ibo ibaji magizüker aser pai ashiba agi, “ni business dak sendakba nungdang Prasant den metettepa liasü aser kü dak tai tongloktsüba onük ajakji tiyazü.”
Pulin ji diabetes agi kangshir ka lir aser iba jagi pa apuba sülen Assam Medical College and Hospital-i pa temang tendangtsü atema anir ao.
Prasanta-i chief minister Sarbananda Sonowal, health minister Himanta Biswa Sarma aser Assam Police tanishisang Mukesh Sahay nunger dangi züluba shidi ka tokja liasü aser iba nung, Pulin-i pa ashioktsü aser iba jagi par kibong soseta asütsü telemtetba agi ta zülua lir.
Shidi nungsa ashiba agi, Pulin-i sorkar mapa agütsütsü ta ser nisung 62 nungi sen lakh 77 saruden saka ibaji mataloktsü.
Mapa bushir kari Prasanta dang parnok nem sen meyipa agüjang ta rongshi aser iba khuret makokba agi pa soseta asür, ta shidi nungsa zülua liasü.
Prasanta tedii Pulin Gogoi anema FIR benok aser pai ashiba agi shidi indang handwriting ji pa tenu den kasa lir. Iba onük atema forensic laboratory-i bushidar.
Iba ken o bushisüngdangtsü atema Additional deputy commissioner of police (East) Bibekananda Das lenisüba kübok special investigation team ka tentetogo, ta City police commissioner, Hiren Nath-i metetdaktsü