Nisung 4,095 tashi Nagaland-i marutsü

Dimapur, May 17 (TYO): India kübok tanga state tem nung anendaka alir nisung 4,095-i Nagaland-i marutsü osang sangoktsüogo aser iamstranded.nagaland.gov.in portal nung khen atema Rs 10,000 teyari agitsü atema tenüngtem agütsüogo.
Iba 7:00 agütsüba inyakyim ya yasüng 7:00 ako nung temogo. Tanga state tem nungi nisung 1382 tashi Nagaland tongogo, ta Principal Secretary Home, Abhijit Sinha-i metetdaktsü.
Health & Family Welfare Department-i lapokba Nagaland COVID-19 Toll Free Helpline Number- 1800-345-001 nung call 595 tashi süogo. Maneni, nCOVID-19 Nagaland- Visitors App ajanga nisung 759 mita reprangdar, ta paisa ashi.
Deobar nikongtsütsü tashi nung Nagaland nungi sample 952 tashi tendangtsü atema yokba nungi sample 914 negative ta putetba osang nguogo.
“Sample 38 indang osang ano mangu lir. Tanü nisung 3004 tashi screen süogo aser Facility Quarantine nung nisung 1406 yua lir” ta Abhijit-isa metetdaktsü.
“Tanü Nagaland Chief Secretary-i district ajak nungi Deputy Commissioner, Superintendent of Police aser Chief Medical Officer tem den video conference ajanga senden ka menogo. Senden nung tangalen nungi arurtem quarantine asütsü atema onük lemsatep” ta paisa ashi.