Nisung 85 rongsetba California morokmi remseptetogo

Los Angeles, Yimpoksüi/Nov. 26 (Agencies): California puti otsü nung morokmi tesashitiba ajanga Paradise jila ajunga rongdoka nisung 85 rongseter aliba mi noklang shilem Amungnü remseptetogo, ta state fire official temi ashi.
San Francisco north tsütsü Camp Fire adokba sülen nisung samar bushitepba ya Amungnü tashinung 249 lir, ta Butte County Sheriff indang office ajanga ashi. Samar bushitepba nisung ya 475 liasü, saka aika tesem balala nung atsükoka liasü, kar hotel mesüra medemertem den liasü, ta ketdangsürtemi ashi aser parnok samar bushitepba ya parnokia memeteti liasü, ta ketdangsürtemisa ashi.
Yimpoksüi/November 8 nü nungi tenzükba Camp Fire ajanga ki 14,000 jungnüa samatsü aser ali acre 154,000 (hectares 62,000) shi arong – San Francisco tasazük pungosüshi.
Samar alirtem bushitsü asoshi anogo ishika tsüngsang mopung takong alitsü, saka Sangtennü menur tzünglu inch 2 nungi 5 tashi Sierra Nevada tenemtsünglen taruba Amungnü tashi arutsü imlar, aser iba ajanga ajungben tzümetsüng adoktsü akok, ta tzüngsang mopung takzürtemi shia lir.
“Tzünglu sashia arutsü akok. Aser iba nungji lendong tulu lir, kechiaser arm ajunga rongdoker, anungji anentsüh alutsü akok,” ta College Park, Maryland nung federal Weather Prediction Center nungi meteorologist Brian Hurley-i ashi.
Taoba hopta tzünglu inch 2-3 aruba ajanga ki aika auyi kümer aliba mulu kümdaktsü aser ketdangsürtemi nisung samar aliba bushitsü asoshi mapa tasak aküm. Nisung tasümang karbo kodanga mangutsü akok, ta Butte County Sheriff Kory Honea-i ashi.
Tang tashi iba morokmi adokba indang kuli monguteti lir.