Nisung aikati meteta aliba actor Tom Alter süogo

Mumbai, September 30 (Agencies) : Nüngtugu theatre, film aser television actor Tom Alter süogo. Pa arishi küm 67 liasü.
Alter ya teküp cancer den mapa talangka rarar külen yasüng par kidang tango sadema iba lima nungi pila, ta par kinungertemi sangdong ka ajanga metetdaktsü.
“Actor, kaketzülur, director aser Padma Shri dang masü saka kü temeim kinungbo aser tebuti, Tom Alter asüba osang ya onok kanga dang temulung shirangseta sangdonger.
Tom Hokolbar aonung kinunger aser kibong rangben lia kidang asü. Onoki kibong nung tatembang nüngdaktem tembanga inyaktsü asoshi mapang tatsüka kecha meinprong melidaktsüner,” ta asür kibong ajanga agütsüba sangdong nungji zülua liasü.
America nunger nungi jakzükba, Indian actor, Alter ya America nungi aruba missionary jabaso lir. Pa ya 1950 küm Mussoorie nung aso. Pa Woodstock School, Mussoorie nung azüng aser iba sülen Pune Film & Television Institute nung azüng.
Actor Alter-i film 300 dak tali nung shilem agia lir aser item film rongnung Satyajit Ray-i yangluba film “Shatranj Ke Khiladi” aser “Junoon” na dena lir.
Pai shilem agiba Hindi film mezüngbubaji Ramanand Sagar-i 1976 küm yangluba ‘Charas’ lir. Pai “Aashiqui”, “Parinda”, “Sardar Patel” aser “Gandhi” film tem nunga shilem tajung agia lir.
Kodang television tsütsü reprangdangdir, Alter-i “Bharat Ek Khoj” aser “Shaktimaan” otsütem nung shilem agia lir. Pai Bengali, Assamese aser Telugu cinema tem nunga shilem agiogo. Pai cricket asaya kanga meim aser pai saisapong indang otsü dena zülua kaketa dena zülu.
Pai tesüsa shilem agiba filmji Alok Nath aser Farida Jalal na den “Sargoshiyan” film nung shilem agiba liasü. Iba film ya taküm May ita nungang saya.
Alter-i ano theatre nunga kangasa junga shilem agiba ajanga ajaki pa kanga jangja aküm. Pai “In Ghalib In Delhi” play nung linük lunga shilem agia jajaogo. Iba play nung pai nüngtugu sangro zülur Mirza Ghalib ama tongti shilem agi.
Pa ya ano saisapong osangbener ka liasü aser Sachin Tendulkar mezüngbuba India asoshi cricket asayatsü mapang TV atema interview agisangji pa lir.
Alter-i arts aser cinema nung tangar dang tajungba shilem agitetba ajanga 2008 küm Padma Shri senpet angu.
Alter-i kinungtsü Carol, jabaso Jamie, aser jala Afshaan nunger toktsür iba lima nung pila.