Nisung ajak tongtibang

Mongdangmongji aser lokti senden nung dang masü saka kiyir benjong aser Arogo jubilee mapang nung dena tamendak menden aser chiyongdak tesem nung tongtibang nisung  (VIP) amendak balaka shimteta yutsüba sobaliba ya asenok asoshi awashi metetba sobaliba tajung ka ama benshia aruogo. Ibaji dang masü saka yimsüsür aser ketdangser amenba gari kolaktem nung light temerem pereta senzüba ajanga parnokji tongtibang nisung (VIP) mesüra kanga tulur (VVIP) ta shisanga metetdakja senzüba asenoki nguogo. Item mapatem jagi alima nung tilar o tulur na bendanger, anungji kasa meimchirsa süaka telok ana küma lemsar, tilartemi tulurtem tenzüker aser tulurtemi tilartem mezüngmeshir ta aliba lima ka nung asenok talangka liogo. Ajisüaka, tang Narendra Modii aniba Centre government-i iba ama tulur shisanga senzüba aser benshiba sobaliba anendaktsüogo aser tang nungibo nisung kar mejeteta tongtibang nisung mesüra kanga tongtibang nisung ta lokti nung lemsaa züngshiba sobaliba malitsü metetdaktsüogo. Aji oda, Narendra Modi-i ashiba ama, tang nungibo linük nung nisung kar mejeteta ‘Very Important Person ‘ (VIP) malitsü saka ajak tongtibang nisung asütsü, anungji VIP melen  EPI (Every Person is Important) alitsü ta metetdaktsübaji yimsüsür aser tulurtem kübok  nübortem tsübuseta tarakzüka sadema marakzüktet aliba tia nungi nüjiso angur amai asütsü. Atangji, linük nung VIP sobaliba aliba ajanga nübortemi shimtetba yimsüsür aser nübortem tenzüktsü asoshi shimtetba ketdangser tulurtemang nisung ama aser nübortemjibo shiruru jenjang nung ali ama maparen aika nung tenzüktsü melen mezüngmeshiba ajangshia aruogo. Aji oda, tulur asünungji tetsüng agibo tatsükata mejajatsü, bodyguard medenibo tenla kidangia maotsü aser escort mendenibo office-ia maotsü ta yimsüsür aser tulurtem aika peisasa pei dang nungi tuluba amato bilema ngasangatema pongmang lima nung alir ama aliba nguogo. Yimsüsür aser tulur asünungji lenmang temesü nung süaka tangar ajak ajateta karaa aotsü. Iba amaji siren ola agüja nübortem dak motzü seplokja aser auyi ponglokja parnok ajateta moura yimsüsür aser tulur memesük ama asenoki bilemba shisatsü ka asenok dak liadokogo. Ibayongji, yimsüsür aser tulurtem sademsadema süidaktsütsü asoshibo kanga kodamasü tasür shiranger abenba ambulance gari asüyonga anena atatsü. Ashiko, yimsüsürtem karibo kitsükkirong lendong nungi nübortem kümzüktsü asoshi ooya aliba fire brigade gari dena soittsüa akok. Aji oda, asenok yimsüsür aser tulur akümba yimyaji metetmeteta nübortem tenük agi mangur aser nübortemia parnokji tsüngrem ama tsübur, kechiyong nübortem kolok nung alar ama bilemtsüsa tekolok aser tangatetba enokja lir. Aji oda, asen lima nungbo yimsüsür aser tulurtemi pei amenba gari kolak nung light temerem meinok senzütsübaji lapir lapir bilemtsüa akok, kechiyong iba tangatetba aser sobaliba nung arur talangka. Iba jagi gari kolak nung light temerem agizüka ayubaji yimsüsüba aser ketdangsüba menden nungi atsüzüka yutsü amai bilemtsüa akok.Ajisüaka, VIP sobaliba benshiba ajanga nübortem tenzüktsü shim ser nung nübortem nem tenzükdaktsür. Iba jagi aiben nübortemi par tenzüker mesüra par kilir majurutetter. Aji oda, VIP sobaliba benshiba ajanga kilirtembo anisüngzüka jangratema alir aser kiburtem, aji nübortem, -bo timatemer. Nisungtem rongnung yamaji karbo kanga tongtibang aser karbo tongtibang masü ta bendanga amshiba ajanga külemi longjemer pei lima asoshi meinyaktetter. Aji oda, taküm piyong kiburiang kilirji kanga tongtibang nisung ta bilema akümtsübuba ajanga kilirtem kanga asüküma kümer lia, iba asüküm menden nungi ali tashi alur nübortem den külemi lia alu mapaa inyaktsü aser terenlok mapatema reprangtsü ta inyak tenzüktsüba anogo tasen ka adokogo. Atangji, ibai India tasenba yangluba mapang lir.India tasen küma yangludang maparen karbo asenok dak mapetba mapa aser yimsüyimpong bener arutsüa akok. Ajisüaka, India tasenba ka yanglutsü asoshi ngasangatema aliba menden nungi ajemalua alur nübortem den jenjang ka nung külemi lia tenzüktsü apusoba sentong nungjibo Naga nunger yimsüsür aser tulurtem tama asütsüla. Ibajiang shitakba Khristan yimsüi sayuba inyakyim aser sobaliba asütsü.