Nisung asemi ganja sen crore ka alang bener lia apu

New Delhi, April 6 (Agencies) : Delhi nung sen crore ka alang ganja shibelener  nisung asem pua lir, ta Bodhbarnü police-i metetdaktsü.
Rohit, 22 aser Sunny, 22 na Southwest Delhi nung aliba Naraina tesem nung March ita tamalen apu. Ano tena den lokteper inyaker aser Vijaywada, Andhra Pradesh nung police-i aputsü bushia alisang arishi küm 33 tain, Naga Vankat Kumar-a pa aliba jila nung Mongulbarnü apu.
Joint Commissioner of Police (Crime Branch) Ravindra Yadav-i, Rohit aser Sunny nati ganja seret 1,060 bener lia apuba ajanga state ka nung ka tashi drugs shibelenertem inyakyim putet. Tenati iba sen aika alang ganja ya drugs shibelener tettsüi Dharambir nem truck gari ka nung benetsür oya-a lia apu. Dharambir ya kong lira ano mejangjateti lir.
“Iba ganja ya Rajahmundry, Andhra Pradesh nung alizük aser Police ashioktsütsü atema bosta 53 nung seper, narikol bosta 67 den meyoktepa bener truck gari ka nung Delhi-i bener oya-a liasü,” ta police ketdangser kati ashi.
Tang pua alirtemi tuyuba dak ajemdaker Andhra Pradesh nung ganja shibelener parnok asem, Kumar, Kiran aser Sriniwas nunger tang poloice-i tebushidak lir.