Nisung asüba shilem 4% bo talanglang amenba ajanga lir

New York, September 25 (Agencies): Alima nung nisung asürtem shilem pezübo (küm shia nisung 433,000 shi) anogo nung ghonda asem dak tali amenba ajanga lir, ta study tasen ka ajanga bushitetogo.
Tesüiba küm ter tsüngda study balala ajanga asenoki mapang tali amenba ajanga timtem agütsüba bushitetogo.
American Journal of Preventive Medicine osang nung adoktsüba study ajanga, linük 54 nung 2002 nungi  2011 küm tashi bushisüngdangba study ajanga ‘chair effect’ ta asüba timtem bushitet.
“Alima nung anojungi asüba nokdangtsü atema asenoki mapang kanga ajema amentsüji tongtibang,” ta University of Sao Paulo, Brazil nungi iba study agir tongti, Leandro Rezende-i ashi.
Paisa, “Bushisüngdangba linüktem nung ajemdaker onoki bushitetba agi, asenoki amenba mapang ajemba ajanga arishi 0.20 agi atsülangtsü,” ta metedaktsü.
Iba bushisüngdangba ajanga, alima nung nisung shilem 60 dak temai anogo nung ghonda asem dak tali amener- adurartemi anogo nung ghonda 4 shi amener ta bushitet, aser iba kuli ajanga asürtem shilem 3.8 bo tali amenba ajanga lir ta bushitet.
Linük 54 ji Western Pacific, Europe, Eastern Mediterranean, America aser Southeast Asia nung aliba linüktem lir.
Parnoki asadangtetba agi, asenoki amenba ajema ghonda ana dang kümra ibaji ajanga arishi shilem 2.3 atsülangtsü.
“Item tebushitetba ya karbo tawa World Health Organisation-ia metetdaktsüogo,” ta Rezende-isa ashi.