Nisung bendanga amshiba magizüktettsü: Rijiju

New Delhi, February 04 (Agencies): Tawa Karnataka, Bengaluru nung Tanzania tsür (Africa) ka dak süoshi semzükja teka sangshiba ken o nung Brihostibarnü Union minister, Kiren Rijiju-i, iba tatalokba ya maksütsü ka lir, aser linük nung iba amai nisung bendanga amshibaji magizüktettsü, ta metetdaktsü.
Tanü New Delhi nung osangbenertem den jembidang Minister of State for Home Rijiju-i, “Küm 200 tashi bendangertemi India nunger alar tia nung ayu. Nisung bendanga amshiba anema asenoki rara-a arur. Ajisüaka India nung nisung bendanga amshitepra, ibajibo sorkari kanga süoki ia agitsü,” ta ashi.
Deobar aonung Bengaluru nung Sudan (Africa) nunger kaketshir kati gari agi tetsür ka dak menüngba sülen nisung aibelena lokti kati Tanzania tsür arishi küm 21 kaketshir ka dak süoshi semzükja azük.
Iba ken o nung Tanzania High Commission-i India External affairs ministry dang aibelenertem nem tapet temerenshi agütsütsüla ta mepishia liasü.
Iba ken o dak sentakba nung Bengaluru Police-i nisung pongu puogo aser parnok anema ken o benokogo.