Nisung ishikadi dang Seva Kendra tem semdanger: Hajela

Guwahati, Aenjeti 3 (Agencies): National Register of Citizens (NRC) mezüngbuba draft sayaba sülen nüburtemi seva kendras semdangtsü melena online ajanga parnok tenüngtem bushidangdar, ta NRC coordinator Prateek Hajela-i ashi.
Pai osangbenertem dang ashiba agi, Sangtennü (Mongolbar) 2:00 ako tashi nung NRC puri website 12 lapokja aliba nisung crore 2.14-ibo semdangogo. Maneni office ajanga text messages lakh tenet dak tali yokogo, ta paisa ashi.
“Seva kendras semdangertem ishika dang lir saka kasa mapang nung tang tashi nung onok indang website semdangertembo crore 2.14 lir,” ta Hajela-i ashi. NRC office ajanga nüburtem parnok tenüng reprangdangtsü asoshi website pezü lapokja lir. Nüburtemi website ajanga parnok tenüngtem kanga bulua bushidangba ajanga Tentonü (Hombarnü) office ajanga website talila ti lapoktsü.
Amongnü ayaterem nung NRC sangdonga liasü aser iba nung nisung crore 1.9 tenüng adoktsüogo. Ajak senteper Assam nung kibong 68.27 nungi parnoki crore 3.29-i NRC nung parnok tenüng züngoksemtsüba atema kuli kaket balala benoka liasü.
Hajela-i ashiba agi, tenüngtem ajak adoktsüba sülen ang parnoki tashishitsü balala alibatem agizüktsü. “Ajisüaka spelling nung aibelena aliba tembo tanga metongshitettsü. Nüburtemi seva Kendra tem semdanga iba maparen inyaktettsü,” ta paisa ashi.
Nisung aikati parnok tenüng aibelena ajenoka aliba ashishiogo. Maneni Hajela-i nüburtemi parnok den teka amteper inyakba atema parnok tenüng asang.
Taoba chief minister Prafulla Kumar Mahanta shibai Assam Movement ani, pai Ato Kilonser den ajurutepogo aser NRC nung tashishitsü meketi inyaktsü asoshi akhang. Pai maneni Citizenship (Amendment) Bill, 2016 anema nokdak.
AIUDF nungi züngsemtem general secretary Hafiz Bashir Ahmed Qasimi-i anir Sangtennü (Mongolbarnü) Hajela den ajurutepogo aser pa dang NRC tekaratiba nung renemtsü asoshi mepeshi.
Hajela-i parnok dang Supreme Court tetuyuba dak ajemdaker maparen ajak inyaktsü ta metetdaktsü. SC-i aachayanga iba maparen inyaker aser taruba ita iba ken o angadangtsüba lir.