Nisung kasettsü merangba mapa CNTC-i aitsür

Dimapur, May 11 (TYO) : Nagaland State Agriculture Marketing Board nung Executive Officer, Benri Mozhui kasettsü merangba mapaji kanga sashi aitsür ta Central Nagaland Tribes Council (CNTC) teloki metetdaktsüogo.
Dimapur nung Duncan Basti mepu nung May 08, 2017 aonung par kidang nisung ana aruagi pa dak akhatsü merang saka mekhashii pa taküm kümzük. Nisung ana rongnungji kabo tsümar liasü. Iba ama mapaji Naga nunger mezüngmeshiba mapa lir, anungji parnok dakji tapet mapa inyaktsüla ta CNTC teloki bangdak nung alirtem nem takangba ka agütsüogo.
Tsümartemi asen ki tashi aruagi asen taküm agitsüsa amokmerenba mapa nungji lendong tulu keta lir, anungji Naga nungertemi tsümar ayongloker pei adianu taküm agitsü merangba mapatemji meinyaktsüla ta CNTC-isa metetdaktsü.