Nisung kati Air India tayimtsü agitsü amokmeren

Mumbai, November 22 (Agencies): Hokolbar nü Air India call centre dangi call ka ajanga Air India tayimtsü agitsü amokmerenogo.
Phone call ajanga amokmerensang jagi pa ISI züngsem lir ta ashiba den külemi November 28 nü Air India tayimtsü ka agitsü ta amokmeren.
Tawa kiralongrartemi Paris yimti amakba sülen alima nung airline security akhangshiba mapang ka nung iba amokmeren ajanga CISF security tashi itshiogo.
“Call asüsang jagi pa ISI züngsem ka lir ta shia November 28 nü tayimtsü ka agitsü ta amokmeren,” ta Air India otongdar kati ashi.
“Nüngdakba mera ajak agigo,” ta ketdangserisa ashi.
Item ama amokmeren atema standard operating procedure maparen tenzükogo aser airline Call Centre aliba tesem, Thane nung aliba Shrinagar police station nung Air India-i police ken o ka benokogo, ta paisa metetdaktsü.