Nisung kati France nung nisung 84 tepset, 2012 yirutsü

Nice, July 15 (Agencies) : Brihostibar aonung France kübok Nice yimti nung Bastille Day fireworks benjung amungba mapang nisung kati truck gari nung mener benjung amungertem menüngset aser ano prangpong agi aika kahset.
Iba nisung jagi mile ka shi gariji anir ao aser iba mapang nisung 84 tashi tepset aser ano 202 yirutsü.
Paris prosecutor, François Molins-i ashiba agi, iba nisungji Mohamed Lahouaiej Bouhlel ta jangjaogo aser pa ya delivery-truck driver ka liasü.
Iba dak sendakba nung telok shingaia tenüng agia mesangdong saka internet nung Islamic State aser Al Qaeda teloktemi pelaba metetdaktsüogo.
“Onoki kiralongraba mapa metsübur aser iba küboki maitsü. Mapangtem melenshiogo aser France-i kiralongraba den alitsüsa mapang aruogo” ta Prime Minister Manuel Valls-i Hokolbarnü metetdaktsü.
Tesüiba mapang Bouhlel ji auyaba ken o tem nung aija lir aser taküm March ita motorist ka dak teka sangshiba atema ita trok ‘suspended sentence’ agüja liasü. Pa ya intelligence services-i mememet aser government database nung kiralongrba dak sendakba nung khen danga tai tongloka maliasü, ta Paris prosecutor, Molins-isa ashi.
Brihostibar aonung 10:30 ako meta Bouhlel-i aniba truck gari tulu kaji Promenade des Anglais-i aru. Mezüng truck gari jagi nisung ana menüngset aser iba sülen lenmang nung mile 1.1 shi anir aodang nisungtem menüngset. Tatem nung police-i Bouhlel kahset.
Nisung 84 tashi asüba rongnung tanur 10 dena liasü aser bendangertem rongnung German kaketshir 2 aser parnok tesayur ka, America nunger 2, Tunisia nunger 2 aser Russia nunger ka dena liasü.
Ano iba tatalokba nung nisung 202 yirua aliba rongnung parnok 52 bo kanga mejungi yirua lir aser ani 25 tashi intensive care nung yua lir, ta Molins-isa metetdaktsü.
“Kechiba Nice? Kechiyong iba yimti ya alima ajungai meteta lir, iba yimti ya alima nung tobur tajung yimti rongnung ka lir. Kechiba July 15 nü? Kechiyong iba anogo ya nüjiso anguba benjungmung lir. Iba nungji ajemdaker kiralongrar nisungi France amak” ta France President, François Hollande-i tanü ashi.
Iba lendong atema France-i anogo asemnü linük nung mangyimtsü osang sangoktsüogo aser alima lennirtem- Pope Francis, US President Barrack Obama, Germany Chancellor Angela Merkel aser Britain nung prime minister tasen, Theresa May nungeri kiralongraba mapa kukua aitsüba aser France pusema nungitba metetdaktsüogo.