Nisung lakh 3.5 tak temai national anthem atenba ajanga alima nung otsü tasen yangluogo

Rajkot, January 21 (Agencies): Gujarat nung aliba Rajkot district kübok Kagvad tesem nung sentong ka nung nisung lakh 3.5 tak temai linük naklu ken atenba ajanga alima otsü tasen ka yangluogo.
Hindu nunger tekülem ki Khodal Dham nung kürakyanglu Khodiyar inokba sentong nung iba ken ya aten.
“Guinness World Record nungi terepranger lia anthem ya nisung lakh 3.5 tak temai aten,” ta Khodal Dham nung ketdangser, Hansraj Gajera-i ashi.
2014 küm Bangladesh nung nisung 2,54,537-i national anthem tena otsü yanglu, aser tanü iba otsü yanglushiogo, aser onoki Guinness World Record ketdangser ket nungi kulikaket nguogo, ta Gajera-isa ashi.
Iba sentong nung ‘Shobha-yatra’ (procession) talangtiba (40km) ayongzükba aser ‘mahayagna’ atema tzü ajemtsü pongdang 1008 inokba ajanga Limca Book of Record nung otsü tasen ana yanglu, ta paisa metetdaktsü.
Khodiyar kürakyanglu ya Leuva Patel kin-i kanga akhümtsübua amshir.
January 17 nungi tenzüka iba kürakyanglu inokba sentong ya anogo pongu agia liasü aser iba mapang nisung lakh 50 tak tali iba tekülem kidangi arua semdanga liasü, ta ketdangsertemi metetdaktsü.
Iba tekülem ki ya sen crore 60 entoka yanglu aser iba tekülem ki anasa Agricultural University ka lapoktsü sentong lir, ta Gajera-isa ashi.
BJP aser Congress lenir aika iba tekülem ki semdangi aru, ta paisa shisem.