Nisung mejangjai noksa tai adoktsüba asoshi news channel ka dang sen crore ka temenok agütsütsü latettsü

– S. T. Yapang Lkr. Kohima.

Nisung mejangjai noksa tai adoktsüba asoshi Civil Judge (Senior) Division, Dimapur okadaki ‘Times Now’ 24×7 English News Channel dang Imkongnükshi Imchen nem temenok sen crore ka agütsütsü obendang agütsüogo. Iba tatalokba ya June 30, 2010 anogo nung taoba Nagaland Kilo Kilonser Imkong L Imchen Nepal nung par temzüngi memelaba sen talila bener aliba ajanga Nepal mitkartemi sottsüsa aküm, saka iba osangji ‘Times Now’ 24×7 English News Channel nung osang prokshidang noksa aibelena sayu. O nung ‘Nagaland Kilo Kilonser Imkong L Imchen sen talila bener lia apu’ ta azüng aser ozülu nunga sayu, saka noksa nungjibo Imkongnükshi Imchen tejak nung temerem agi polonger dang adoktsü. Anungji ibaji aibelenba aser nisung züngshia melii tapi agi inyakba maparen ka asünungji Imkongnükshi Imchen-i August 18, 2010 anogo nung iba tatalokba asoshi hopta ana tsüngda National aser State osang kakettem nung metongshia, tatok meshia sangdongtsüla ta tezüluba nung agütsü, saka parnoki (‘Times Now’ 24×7 English News Channel) süoksünangi magii metongshiba (corrigendum) osang ka dang osang kaket ‘Times of India’ September 3, 2010 aser ‘Nagaland Post’ September 4, 2010 anogo nung adoktsü. Iba ama tai maketba nübu ka tai tonglokja sayuaka tatok memeshii züzüa dang ‘metongshiba’ agi tembanger yutsü, anungji iba anema Imkongnükshi Imchen-i okadak keno aben aser December 8, 2015 anogo nung temenok sen agütsütsü asoshi obendang agütsüogo.
Iba ken o ya okatsür Wb. Alemwapang, Advocate-i okatsüa liasü. Pai “Wb. Imkongnükshi Imchen mezüngmeshiba aser süoki mai toktsüba ajanga pa kanga timtemdaktsüogo, lokti aser nübur madak tejak menentsüogo, shisatsü nung timtem jenti nguogo, anungji pa nem iba melena tim temenok agütsütsüla” ta nokdak, anungji yangji ajemdaker obendangeri “Nisung mulungsentsü yirutsüa maak südaktsübaji rongsen agi küptangtsü makok” ta shia temenok sen crore ka (1,00,00,000) den talila merijang tenem (50,000) densema agüjang ta tetuyuba agütsü.
Iba temenok sen ya anogo 90 tsüngda agütsütsüla, ibaji tashi mangara, iba sülen tetemlok 10% atutsü ozüng agütsüogo.

You must be logged in to post a comment Login