Nisung meyirjang 60 dak temai Kisama semdangogo

Kohima, Luchii (December) 2 (TYO): Naga Heritage Village Kisama nung Hornbill Festival tenzüker anogo ana tashi nung nisung 60,000 dak tema aruogo.
Nisung 63032 rongnungi foreigners 780, domestic tourists 8241 aser local visitors 54,011 liasü, ta Assistant Director of Tourism Department (Statistics) T Khakihe Sumi-i ashi.
Yashi benjung tenzükba anogo nung nisung 19,953 aru aser tanü 43,079 liasü, ta pai ashi.
Tanü National Dance and Music Day ta ser amung aser iba sentong ya North East Zone Cultural Centre (NEZCC)-i “Cultural Connect” omen nung ajemdaker ayongzük.
Odisha, Assam, Manipur, Madhya Pradesh, Meghalaya aser Jammu & Kashmir nungi sobaliba shilem agirtemi benjungmung nung aden.
Sentong nung Nagaland Governor P. B. Acharya-i o jembidang “NEZCC ya NAMASTE state tem- N-Nagaland, A-Arunachal Pradesh, M-Manipur, Meghalaya & Mizoram, A-Assam, S-Sikkim, T-Tripura aser E-East indang sobaliba takar ajungkettsü aser kümzüka ayutsü atema tentetba liasü” ta ashi.
North East indang sobaliba aser inyakyim khenyongi balaka aser tamangba yimsü temeyoktep den state tem nung lisopur shia indang sobaliba balaka lir. Lisopur kin shia indang sobaliba, tsüngsangba, chiyungtsü aser mapa balala lir. Kin shia pei indang maitsü, sobaliba, yimyatsüya balala lir saka nübortem putepa aser yimjung nung alir, ta paisa shisem.
Benjung mongpu ya North East India indang sobaliba aser sübosolemtsütem sayutsü mapang tajung lir aser kintem atema benjung ya kanga dang tongtipang shilem ka lir, ta Acharya-i metetdaktsü.
NEZCC tentetba nungi North East state tenet indang sobaliba aser inyaksangshitem wazüka, anepalua aser prokshia arur. Tang NEZCC kübok registered troupes 5000 dak tema lir, ta paisa shisem.
North East India nung kenten aser tsüngsang balaka aliba dang masü saka rock music indang industry tongti ka kümogo. North East nunger dak arts sempet keta lir, handicrafts aser handlooms kanga junga yanglur aser alima ajungalen kanga sapua amshir, ta Governor-isa metetdaktsü.
Tanü Kisama nung agiba sentong nung Tourism, Art and Culture, MLA H. Khehovi Yepthomi, Water Resources Development Advisor Namri Nchang aser Fisheries, Evaluation, Economics & Statistics Advisor L. Khumo nungertem host liasü.