Nisung meyirjang aika adenshia asür Hokevi nem akhüm agütsü

Dimapur, August 05 (TYO): Tanü Honibarnü asür, H. Hokevi Chishi’er nija kidang Sematilla, Dimapur nung nisung merirjang aika adenshia asür nem akhüm agütsüogo; pa arishi küm 52 lia August 4, 2017 nü alima nungi pilaa liasü.
Asüpila sentong nung nisung aikati jembia liasü aser parnok rongnung Irrigation & Flood Control Parliamentary Secretary, Tovihoto Ayemi-i 2003 küm tenaprong NPF nung külemi adenba bilemteta, “Asür H. Hokivi Chishi ya jembiba ama inyakba aser tangatetba nung akhanga nokdakba nisung ka liasü, aser pai tepetzük tia nung alirtem, minority tem aser lanurtem nüngdak balala nung meranga inyakogo. Pa asüba ya ajak atema takoksa lir,” ta metetdaktsü.
Paisa, “Asür Chishi ya tangar atema bilemtsüba nisung ka liasü, aser telemtetba magidang tensa ajak tip anatsülen nungi tama asadang. Pa ya lokti tentet aika nung densema liasü aser lokti nung temelenshi adoktsü atema inyaker ka liasü. Nisungtemi pa taküm nungi tatishitsü agitsüla,” ta ayongzük.
Tovihoto dak alia asür kibong züngsemtem, Ato Akukau (Head GB), Zutovi Village, Vikuto Achumi, Akukau (GB), Kiyeto Village, Aqahuto area, Azheto Zhimomi, Ex-Deacon Zutovi Village Baptist Church, Hokishe Chishi, Western Sumi Hoho Tir, Zheshito Swu, Sematilla council Chairman, K.Kinilimi aser K.Kakheho Yeptho nungeria asüpila sentong nung jembi.
Asüpila sentong ya Rev. Shitovi Swu leniba nung agi aser Dr.Hesheto Chishi menden liasü.
Asür H. Hokivi Chishi ya Dimapur Chamber of Commerce & Industries Tir teinyakdak liasü. Pai kinüngtsü den jala ka aser jabaso ana toktsür alima nungi pilaogo.