Nisung meyirjang aikati asür JN Aier tushia remogo

JN AIERYajang ‘C’ (Mokokchung), February 15 (TYO) : Honibarnü Yajang ‘C’ yim nung asür JN Aier den par kidang asüpila sentong agiogo aser iba sentong nung Nagaland tesem balala nungi nisung meyirjang aika aden.
Asür J.N. Aier den asüpila sentongji ghonda asem shi ka agi aser nisung aikati asür JN Aier-i mapa tajung inyakba otsü aser kulitem metetdakja liasü.
Asür JN Aier-i 1987 nungi 1991 tashi Yajang ‘C’ Baptist Arogo nung Pastor cum Church Secretary inyak aser Arogoi pai mapa tajung inyakba aser arogo renlokdaktsüba atema tenüngsang tulu agütsü.
Ano, Japukong Senso Senden (JSS) aser Japukong Kaketshir Mungdang (JKM) nungi tanishirtemi asür JN Aier-i mapa tajung inyakbatem bilemteta o jembi. 1930’s aser 1940’s mapang asür JN Aier-i iba telok ana tentetba nung tongti shilem agia liasü.
Pa den aspüpila sentong nung, International Evangelical Fellowship (IEF), Ao Baptist Arogo Mungdang Council (ABAM), Alongtaki Village Council, Lirmen Village Council, Yajang Kiyong pezü yimten aser Yajang ‘C’ Village council nungia lennirtemi o jembi.
Imsongunger Mungdang (IM) tenüng nungi taoba Soil & Water Conservation, Director, Imkongmar-i o jembidang, 1945 küm Imsongunger Mungdang tir tanabuba inyaksang nem tetushi agütsü.
Imsongunger Mungdang tenzükba mapang asür JN Aier-i timtem jenti arema mapa tulu inyak aser iba jagi tanü Imsongunger Mungdang iba jenjang tongteta lir, ta Imkongmar-isa ashi.
Asür JN Aier-i sayutetba kaketshirtem – taoba minister Chubatemjen Ao aser taoba minister Tiameren Aier naprongi tena tesayur nem tenüngsang agüja o jembi.
Sentong nungsa Dr Longri-i Nagaland Chief Minister, TR Zeliang aser Advisor to CM, Merentoshi R Jamir nati züluba asüpila osangtem zünga metetdaktsü.
Ano, ADC Mangkolemba, Imtiwapang Aier-ia Odisha Angh, Dr SC Jamir aser Clark Memorial Hr Sec School, Impur nungeri züluba asüpila osang zünga metetdaktsü.
Asüpila sentong nung Nagaland Legislative Assembly Deputy Speaker, Imtikumzuk Longkumer, Parliamentary Secretary S Chuba Longkumer aser sorkar ketdangsertem den yimten lennirtem aser Mulungtet Teloktem aika aden.
Agriculture Parliamentary Secretary, Dr Benjongliba Aier-i kinüngertem tenüng nung jembidang, par asüku nung teyariteper ajak dang pelaba metetdaktsü.
Par kibong den nübo, rongsen aser sarasadem ajanga nungita yarir ajak Tsüngremi moajang ta sarasademtsür, ta Dr Benjongliba-isa ashi.
Asür JN Aier (1916-2016) ya küm 99 nung lia iba akümli toktsür ao. Pai pa kinungtsü Wt. Chubalemla aser tanur 8 (jabaso 5 aser jala 3) den semchirsemnur 100 toktsür pila.

You must be logged in to post a comment Login