Nisung noklang aika adenshia asür Kiyanilie nem akhüm agütsü

September 28, 2017 nü Jotsoma nung Nagaland Police-i taoba NLA Speaker, asür Kiyanilie Peseyie nem akhüm agutsüba noksa nung angur. 

Kohima, September 28 (TYO): Brihostibarnü Centenary Ground, Jotsoma nung taoba Nagaland Legislative Assembly Speaker aser MLA, asür Kiyanilie Peseyie asüpila sentong nung pa nem tatembangbuba akhüm agütsütsü atema nisung noklang aika adenshia liasü.
Asüpila sentong nung jembidang Naga People’s Front (NPF) Tir, Dr. Shurhozelie Liezietsu-i, “Tesüiba küm 15 tashi ni Kiyanilie den külemi inyaksema aruogo. Pa ya ochi jembir nisung ka liasü. Pai kodang telemtetba agidir, pai iba nungjagi matsüngshi,” ta ashi.
Paisa, Kiyanilie-i pa akumli piyong ochi nung nokdak, ta metetdaktsü.
Nisung ka tangatetbaji kanga tongtibang, ta shia Dr. Liezietsu-i, Kiyanilie ya pei tangatetba tajung nung nokdaker nisung ka liasü, ta ashi.
Kiyanilie-i küm 10 tashi Nagaland Legislative Assembly Speaker inyak, ta shia NPF Tirisa, “Pa Speaker inyakba mapang nung, linük nung assembly senden kanga tesünep nung agitetba rongnung NLA densema liasü,” ta ashi.
Iba dak sendakba nung Dr. Liezietsu-i, asenok ajak nüma tangtettsüsa pai senmang tajung yutsüogo, aser iba atema onoki pa dang pelar, ta ashi.
Asüpila sentong nungsa Rajya Sabha MP, K.G. Kenye-i, Kiyanilie ya tabensa nisung ka liasü aser pa dak aketba sempettemji tanü Naga nunger sensotem dak mangutsü, ta ashi.
Kenye-isa, Kiyanilie-i pa akumli mapang nung lenir ka dak aketba sempet tatishitsü tajung aika sayuogo, ta shisem.
Nagaland Legislative Assembly (NLA) Speaker, Dr. Imtiwapang Aier-ia, Kiyanilie Peseyie ya kanga tongmelang aser ajemalu nisung ka liasü, ta ashi.
Paisa, “2003 küm nungi 2013 küm tashi pa NLA nung Speaker anabenren inyakba mapang nung pai assembly senden tesünep nung kanga takok ngua ketdangsüogo,” ta metetdaktsü.
Paisa, Kiyanilie Speaker inyakba mapang nung 2007 küm assembly complex tasenba renem aser 2007 küm Kohima nung North East Region Commonwealth Parliamentary Association Conference agia liasü, iba den külemi pa lenisüba kübok Assembly Rest House Dimapur yanglu, ta metetdaktsü.
Kiyanilie ya Naga yimtenren onük nung mezüngbuba Joint Legislator’ Forum convenor liasü aser AIDS indang Legislators’ Forum nunga mezüngbuba convenor liasü, ta paisa metetdaktsü.
Pa Nagaland Commonwealth Parliamentary Association Nagaland Branch nung Tir inyak aser North East Regional Institute of Parliamentary Studies, Training & Research, Guwahati nung tatong Tir inyak, ta shia Aier-i, “Pa ya tetemjen lenir ka liasü, aser nüburtem taküm jenjang ajungkettsü atema pa taküm piyong bendanga inyak. Pa mapa nung kanga tenendak liasü aser nübur lenir ka ama pai menden balala nung nendaka inyak,” ta metetdaktsü.
MLA Kuzholiizo (Azo) Nienu-i, “Küm 15 pa den külemi inyaksema arudang ni nisung dak manguba sempet tajung aika pa dang reprangtet,” ta ashi.
Azo-isa, pa (Kiyanilie) küm 10 Speaker inyakdang aser minister inyakdang pai pa mapa kanga temsüa inyakogo. Pai kinünger mesüra kin apir kecha telemdang makai inyak,” ta metetdaktsü.
Kasa sentong nung Nagaland’s social welfare director Merangtsungba Aier, WAPO Tir, Jotsoma village council nungi, Lhousarovi Paul Rino aser mangyimer kibong nungi züngsemtem- Kevineino Meru, Pfiikhrielie Peseyie, Jethro Merry aser Seyiezezo Peseyie nungeria jembia liasü.
Nija aser lokti tentet balalai naro agütsüba dak alia state sorkar tenüng nung Chief Secretary, Pankaj Kumar-i naro agütsü, iba sülen state-i akhüm agüja liasü.
Sentong nungsa Nagaland Angh, P.B. Acharya, Chief Minister T.R. Zeliang, Naga Hoho, NMA aser tangar temi yokba mangyim osang zünga metetdaktsü. Iba sülen Kiyanilie mang par yimdak, Jotsoma nung remtsü.