“Nisung shibai asüng angu”

–  Tiala Imchen, Dimapur.

Alemli asen tetsü-teboutem limapur Putu mapanga, Tsüngrem Tanelai parnok mulungjang nung jembi aser Pungmang nung pungmangdakja aru. Aji saka Tsüngrem Tanelai jembir ta parnoki memetet, saka parnoki meteta aliba Longkitsüngba aser Meyutsüngbai jembiogo ta parnoki amanga aru. Yamaji asung indang Mangdang angusang 16th Century nisung “Seer Nostradamus-a” Khristan masu saka anung, petinu, ita aser anu indang bushir nisung, aser mozü shiteter ka liasu (Nostradamus, was a French Astrologer, Physician, Author,Translator and reputed Seer, who is best known for his book Les Propheties, a Collection of 942 Poetic quatrains allegedly predicting future events).
Pa ya December 23rd 1503 nung aso aser 1st July 1566 (aged 62) nung asu. Mangdang nung Tsüngrem Tanelai pa den jembidang ita, anu aser petinutem nung tamaitsütem sayua jembi aser Mangdang nungji nisung sorubangru, sobusolemtsü aser alinuk tereprangtsütem sayua mangdangji züludaktsü. Ibaji Yohani Jungkai Adokba kaket züluba ama aser Daniel ainkari pa kakettem züluba ama liasu.
Nostradamus anguba Mangdang shin o temji 1555 nungi tenzüka Zülu aser iba mapangji alima ajunga nung France nunger oshiji amshia aliba mapang liasu. Anungji pai Shin Mangdang ajak France oshi nung züluadoktsü, tesulen tangari French nungi English nung meyipzük.
Nostradamus dangi mangdangji koma aru aser koda ataloka tanü tashi arudagi, ibaji dang tongmelang agi lemsateptsü saka pa shin Mangdang 942 quatrains-jibo iba Ocet nungbo meshitettsü. Pa indang mashidang Laishiba dangi tama meyipdi, Tenyar Mapa tapu 2:17 nung yamai ashir- “Tatem anogo nung ner jabaso jalatemi Shintsü, aser ner asangurtemi Mangdang angutsü, aser ner tamburtemi pungmang pungmangtsü”. Anungji Shin Mangdang angurtem taküm indangji mebilemi Osangtemji koma ta Sarasadema shisadanga iba Ocet ya züngdaktsüner.
Nostradamus ya otsüi ashiba agi Yihuda (Jews) nunger Isaker kidong nungi liasu. AD 70 meta pa tebou nunger Yihuda lima Jerusalem toktsür alima ajaklen prokshia senshiba mapang pa tebou nunger France lima tonga arua ali. Anungji pa France lima soa intetaka, pa Yihuda nunger liasu. Alemli tetsü-tebou mapang nungi par kin ya ita, anu, aser petinutem indang study sua takzü-takponga aruba Senmangji Nostradamus dangi aru. Otsüi ashiba agi pai Roman Catholic tekülem yimya nung anidaka liasu.
Pa France lima nung soa intet nung pai France oshi nung Mathematic, Botany, Pharmacology aser Astrology kakettem zünga tashitemetet aküm. Aser ano mozü metetba nung Specialist doctor küma pa nem 1532 küm famous “Doctor Cap” agütsü, koba pa kolak nung semer aseni pa profile noksa nung angur ibaji Doctor tetushi korangji lir. Par putu mapang korang angurji züngteta dang liasu.
Europe Lima nung Khristan Chubatem Henry II, Francies II aser Charles IV nunger Yimsusuba mapang pa nem chuba Yimli asoshi Councillor tenung agütsü. Sorkar aser tamangbaren nung lenmang munguteti arendaka alidang pa nungi tetuyuba ngua liasu. Ano pa nem “taneptsür” The Great Healer, tenunga agütsü. Yamaji ajaklen pa nungsang ayimsunga ao.
Nostradamus nungsang indang angashia Europe lima nung tashitemeteter nisung ka tenung agi Sir Julius Ceasar-i pa aja aser par kidang itasen agüja ayu. Iba mapang pa shisa takaji ajiteta tulur jagi par jala Miss Arieta agidaktsü aser lai tanür ana soa küm pezü tashi pelatepa aliba mapang Europe lima nung ayak wara arua nisung jenti asudang Nostradamus kinungtsü aser tanür anaprongla asu. Iba mangyim tia nung alidang tekoi (father in law) yamai shia pa kidang nungi aridok “I don’t need a doctor, who can’t save his wife and children”. Iba den Satidang indokba rongsen ajak züludener mapang tatakzük ka agütsür menokdaktsü.
Iba shisabulu tia nung talidak makai nemzüa aliba mapang ka nung Shin Mangdang pa dangi aru. Kenu pa medemer ka den gadu nung sanger aodang Nostradamus aoksa dang gadu rongdong nungi alua ali nung apudaker külem, kechiyong pa nukdang chuba chir ka asoba sayu. Idangji pa medemsangi sungmanga nai kechi angu aser shiba külemer ta asungdang. Pai langzü “I must kneel before His Holiness” pa tamaren Temeshiba madang ni apudaktsüla. Pa medemsangi aji temulung nung yua liasu aser küm semer shi suir 1585 nung Swinghdr chuba aküm. Idangji ang kenu tena gadu rongdong nung sanger aodang len tom nung apudaka külemba to bilemtet aser ibaji Nostradamus dangi mezüngbuba Mangdang aruba liasu ta pa tembari küli agütsü.
Kenua Lorraine town nung alir takar nisung Mr. Folorin-i pa indang angashibaji shitak asu masu tendangtsü atema par kidangi aja, aser par Ak ayudaki Nostradamus anir ao. Aser asungdang ashi, par ak anaji koba tia ka nung tembangtsü. Ak chanu temesungbaji tsünui chiadoktsü aser tanakbaji asenok achitsü ta Nostradamus-i ashi. Iba takarsang yagi Nostradamus indang takzü-takpong ajak angashia tenuk merema liasu. Anungji maksudaktsütsü asoshi tendanga, asung aonung chiyungi arung ta shir yok. Takarsangi par kiler dang ak chanu temesungbaji tepseta chiyungtsü renemang ta shir pa Office-i ao. Kiburi ashiba ama kiler jagi ak ayudaki ao saka ak temesungba to tsünui bener oadoker lia ak chanu tanakba to bener arua parnok aonung chiyungtsü renem. Iba tatalokbaji kibur dang meshijungi lia kibur aser Nostradamus na külemi kidangi aru aser Chiyungba mapang takarsangi asenok ya koba ak shi den chiyunger ta asungdang. Nostradamus-i menurema ni yasung shikato koda, asenok ya ak tanakba shi den chiyunger ta langzü. Idangjisa takarsangi calling bell nung anem aser kilersang jet ta aru aser asenok koba ak shi den chiyunger ta asungdang. Kileri langzü, ak temesungba to tsünui chiadoker liasuji ak tanakba to tepseta renem, saka tatalokba meshijungi lia nenok aru. Idangji takarsang kanga maksu angu aser joko iba anogo nungjagi pai Nostradamus dang kanga akümtsübua benshi. Ano Europe lima nung wara tulu arua ajaklen kanga mazüngi Nostradamus nubu aginua tajaba aru.
Mezüng Europe lima nung ayak wara nung pa kinungtsü aser tanür ana samaba den tekoi Senmen aser kibong akümdang indokba sentsüh khuret ajak bener alidang 1544 Küm wara agi shiranger nisung aika asu. Iba mapangji Nostradamus Marsilles yimtii orr shirangertem Yaria aika kümzük aser pa “tanebtsür” ta jaa nisungtemi pa nem sempet hon, taribe aser sen agütsüba agi teko sentsüji küpdang aser kechi anung ibaji sensaker nem lemsaa agütsü.
Nostradamus taker kidang takar jala agir pelaseta aliba mapang pa dangi Shin Mangdang kecha maru. Saka sentsüh tia nung okrongseta alidang pa tali ajemalua aküm aser Tsüngrem tejembiba aser taneptsü sempettem arua sentsüh ajak otet. Item tatalokba otsütem ya tanü asenok asoshi tangazüktsü aser mulungdangtsü otsü lir.
Lipok 13:14 nung ashiba ama Abram Ur lima nungi Tsüngremi jatet saka pa den pa tanük Lot ali tashi Tsüngremi pa den tenangzükba kecha meyanglu. Saka kodang Abrahami Lot pilaa yok iba mapang nungjagi Tsüngremi pa den tenangzüktepba yanglu.
Nostradamus kodang ajemalua aküm pa taküm nung sentsüh oadokba dang masu France chuba den atongba temaba menden tashi pai ngutet. Aser chubai pa dang pai anguba Shin Mangdang ajak tatonger zülua kaket ka küma ayutsü mela. Küm aika tejaklen züluba iba shin o temji tanü tashi ataloka arudagi.
Henry II chuba masudang 27th June 1556 küm Nostradamus-i mezüngbuba züluba shity-:
“Oh tulusang Khristan chuba (Oh Mghty Christian King) Ammang aser anungdang kechi mangdangsa ni angu itemji bilemdanga shisadangogo aser aji tarutsü nung ataloktsü sayur ta angateter. Koma angu aser angashi yamaji tetakzütsü aser tesayubatemji lir aser yangi Europe lima, Asia aser Africa limatem amsema lir.
Oh tulusang chuba, shin o tem tatongi meyipzüka zülutsü kanga tasak. Kechiyong alima kar indang sayudangbo yangji aliba nisungtem sayur aser kar indang ashidangbo par sobusolemtsü ang sayur. Ano tesayudak nung joka oa alima tanga kar sayur, ano alima kar indang sayudangbo tenem mesura ayong kar sayur, aji oda suaka kechi mangdangsa kü dang sayuogo itemji 1585 nungi ka khen ka khen ta ataloka aotsü.
Item shin Mangdang ajak Tsüngrem nungi arur ta ni amanger. Anung nung aliba ita, anu, aser petinutem nung temelenshi tulu alitsü, tzüyim aser mopung nung temelenshi tulu alitsü. Idangji purapuji amangertem alidak nungi tamasa timtemji tenzüktsü.
Oh chuba iba Mangdang shin o tem ya ajakibo pelaa magizüktettsü asubayong par lima tereprangtsü, sobusolemtsü Koma angu yamaji dang mangdangji zülur”.
Kenu chubatsür Catherine-i la kinungbu Henry II aser lar jabaso Charles na atema tia asungdang. Iba mapangji Nostradamus-ji Henry II Court nung alitsü arur ita anabuba liasu. Pai anguba amaji shira chubatsürji mepelatsü ta pai metet nung, Chuba aser jabaso na prongla tia junga lir ta ashi, saka la taoi Nostradamus-i tekümdangtsü o ka dang yamai ashi, “King should not engage in duels in July 15, 1559”. Chubatsüri aji tekümdangtsü o ka ashir dang ta bilem, saka shitakbabo la kinungbu Henry II king of France-ji July 15 nu telok kari tepsettsü ta ashiba liasu. Shinba ama 1559 July 15th nu ji telok ana raratep aser aji nemtemtsü asoshi Henry chubaji anasai ao aser yangji telok kati pa tepset. Iba shin o ji jembir küm asembuba nung atalok. Iba sulen dang chubatsür Catherine-i Nostradamus shin o ji angatet aser Europe lima ajaklen Nostradamus-ji tangur aser temezünger ka ta tali ayimsunga ao
Nostradamus mezüng agiba tetsür sur küm aika kija rongjenseta lir tanaben Miss Anne den kibong aküm. Tena chir tebur chanu ka toktsür pa arishi Küm 62 buba nung 1566 nung asu. Pa akümli mapang aonung ghonda pezü mesura pungu dang mejang aser tanüngba mapangtemji mangdangtem indang bilemdanga shisadangba nung indok.
Nostradamus tasutsü mapang putir ka pa semdangi aru aser tena piladang pai putir dangji ashi, “you will not see me alive at the sunrise tomorrow “. Ibaji Nostradamus tatembangbuba shin o liasu. Tasungnepji putir sang tesemdangi aru saka yashi pa dang ashiba ama pa menden ka nung apudaker sur liasu. Pa tasumangji Cordelies Church tsüngda long angenboka alidak rema toktsü. Tesulen ano ibaji melenshia tesem ka nung pa terettemji rezünga ayu. 1793 French Revolution mapang samarotemi pa teret yua aliba longpokji kakpok aser Nostradamus kolak ret (Sküll) nungji salepsaria tzü ajemdang memetetba tesem ka nungi injang ka arua tzü ajemsangji Kaset. “In 1793 during French Revolution some outlaus pillaged the tomb and pulled of the Seer’s Sküll and one of them drank out of it, the suddently a stary bullet came from somewhere and killed him”. Tesulen 1813 küm pa terettemji belena bener orr Church of St. Laurent nung ayu.
Seer Nostradamus-i pa taküm alidang par jabaso Cesar dang, pa nungi temoatsü agizükang ta züluba oren kar angur:
“Angang kü jabaso Cesar, aser angatetang, ita, anu aser petinutem ajanga tataloktsü aliba kechi sayuogo, ibai tatem makai aliba Tsüngremi sayuba lir. Kü mapang tatembangleni ilunger, anungji ni nungi shisatsü aser sempettem angazükang. Teti aliba Tsüngremi na moajang. Nostradamus,1st March 1555: From Salon.
Cesar tebu ama tazüngba nung degree anguba nisung masu aser pei sasa meranga bushiba nisunga masu. Pa tebu taküm alidang pai tebu den lia angazükba mapang magitet. Saka kodang tebu asu pai tebu sempettem pa dak keta lir ta sayutsü merang aser Tsüngremi pa den mejembi surnung jembiba ama Vivari town yakta mi agi rongdoktsü ta sangdong. Aser aji shitak ta sayutsü atema pai miima mi senoktsü aser town nung ki aika mi agi mitsü küma rongdok aser ano paisa nenoki shin o nung temulung magütsüba ajanga takoksa angur ta jembimeso . Saka tenuk küli kar ajanga miji pai senoka rongdoktsü ta putet anungji pa tepseta indok.
T. Mapa 19:13-15 nung Yihuda nunger Puti Unger Shua jabaso 7-i parnok dak temenen tanela aridoktsü ain lir ta shia temenen tanelatem anema Yisu tenung nung ozüng agütsü. Idangji temenen tanelai langzüa ashi, “Yisu ni meteter aser Paul-a meteter saka nenok shir” ta shia temenen Tanela aketba nisung jagi parnok dak pungloka parnok ajak akok. Tsüngremi parnok nem temenen Tanela aridoktsü ain agüja mali sernung, lir ama sayutsü merangdang tamakok aser maksu dang angu masu, parnok temang nung zübu keter Jena aoba otsü angur. Yamaji Tsüngrem Tanelai mejembi sernung Tanelai ashir ta ser jembi-ra maksu dang masu takoksa lendong tulu ajurutsü. Ibai tanü asen nubur asoshia tangazüktsü aser tekümdangtsü lesson tulu keta lir, talisa revival amala nung jajartem mesura kiboksem sarasadem senzürtem, aser prayer home amala nung inyaker laymen- tem etc . Tanela Sempettem ya pei jangraba agi marur saka Tsüngremi shir nem agütsütsü mulunger pa / la nem agütsür.
Nostradamus otsü jembir asunung ano pa dangisa meyipdi, tanü tashi Poissonnerie Kong Nostradamus-er Ki liasu, yangji pa Memorial Ki ka yanglua lir aser aji Kaketnang ka mesuka yanglur pai azüngba kakettem aser pai züluba ajak yangji rezünga yua lir. Pa suadoker putu ishika nisungtemi pa taküm aser mapatem amadoker lia tanü tatembangbuba putu nung alima kintemi pa kakettem bushitsü tenzükogo. Pai shinba mangdangtem aika atalokogo aser ano maneni ataloka arudagi.
Tang asen tendak Coronavirus agi alima rangben kangshiba mapang nuburtemi pa shin o tem lepalua bushia züngteper aser Tsüngrem chir tanaben alimai arutsü kishizüng nung lir ta bilema pei tanela jenjang renemtsü meranger. Nisunger tangatetba balala asunung ano karibo anema jembiba Internet media balala nung angur.
Nostradamus shin Mangdang indang tang bulua jembiba onük internet nung anguba kar:-
” Nostradamus mentioned the Coronavirus in his prophecies 465 years ago, he wrote in his book 1555 that in the year 2020, a city bordering the Sea of East Asia would have an epidemic that would bring about a great tragedy in human history”.
Nostradamus penned his predictions in Vagüe fourlined Poems known as quatrains, divided into chapters called Centuries. The bulk of Nostradamus writings published in 1555 and one of his passages is being circulated on the internet. Thousands of people have shared the following words:-
“There will be a twin year (2020) from which will arise a queen (Corona) who will come from the East (China) and who will spread a Plagüe (Virus) in the darkness of night, on a Country with 7 Hills (Italy) and will transform the twilight of men into dust (death), to destroy and ruin the world. It will be the end of the World Economy as you know it”. Asen o nung- Iba jakrep küm 2020 nung anudoklen lima ka nung Chubatsür ka Corona adoktsü aser manger mesangwa nung tasu Wara alima ajunga nung proktsü aser nisungtem aut aoyi küma alima raksatsütsü. Idangji alima nung rongsenketzüng nung akoksatsü. Yangi ashiba ama tanü China lima nungi Corona adoka alima ajunga sungogo, aser Italy tenem 7 lima ya, Corona agi sashia atongba tanabuba linuk ka küma China danga nisung teimba asuba künu nung nisung 700 tema asuba march ita tetenzüklen asenoki nguo. Saka tawabo Spain aser America ama linuktemi ajateta arur dangashi.
Tsüngrem O dangi meyipra- Yiremia 16:4 nung, tasutsü wara tulu agi parnok asutsü. Parnok mang maremtsü, parnok ali tema nung jana ama alitsü, ta ashiba angur. Asenoki Corona wara agi country ka nung dangang sungla kenu nung (24 hours) nisung 700 asuba, USA amala nungbo kenu nung 1000 junga asuba, aser tasumangtem hospital sunga akleptsü ama aleper aliba Video clip nung China, Italy, Spain England aser America nunger linuktem nung atalokba angudang nisung paika to kenu nung koda aremtsü ta shisabulua reprangogo. Iba sulen tasumangtem to shirurua memeyong aremba aser tasudanga kija rongjenseta pei kinunger dang tatem o ka ashitsübo toktsür tenukia mungui alima nungi pilaa aobatem, aser ano kinungertema pei adianu temeimtiba ka, yaritsübo toktsür pei tenukia mungui asubatem aremdang Ola tulu agi ayima jeba temulung raksaba nguogo. Iba tia jagi asen India lima menebogo . Shin o kodanga nisungi mulungba nung marur ta angatetdi.
Joko asenok alima tatembanglak la nung nokdaka lir ta meteta züzüa melili, saka Tsüngrem tali bushidi. Tsüngrem dang asen Jenokdak aser tensa ajak nung anasatiba teyarirji PA lir. Iba Ocet azünger ajak den Tsüngrem Tanelai jembiang ta Sarasademer.