Nisung shibelenba indang ‘legal awareness’ sentong agi

Dimapur, May 5 (TYO): May 5, 2017 nü Nagaland State Commission for Women-i National Commission for Women, New Delhi den yaritepa De Oriental Grand, Kohima nung Human Trafficking indang sentong ka ayongzüka agiogo.
NSCW-i NCW, New Delhi den yaritepa taküm March ita nungi Human Trafficking indang Legal awareness sentongtem ayonga agiyonga arudar aser maneni May 2017 tatemlen tashi agitsü, ta tanü Dr. Temsula Ao-i sentong lapoka jembidang ashi.
Mezüngbuba sentong asemji Kiphire, Tuensang aser Longleng nung college tem nung agi, iba sülen Meluri, Noklak, Tobu, Aboi and Longwa, Dimapur, Peren aser Chiephobozou nunga agiogo aser tang Kohima nung sentong 14 buba agir, ta laisa metetdaktsü.
Iba osang jangja memetetba Naga nungertem aser talisa meta talang pilar aliba nisungtem dang nisung shibelenba inyakyim nungi jenbua alitsü atema iba sentong ayonga agir. Nisung kari yimtsüng aser jilatem dang nungi state adena orr taküm jangratema alir ta tiyazü shia, nisungtem anir aoer, ta Dr. Temsula Ao-i ashi.
“Asenoki ‘Human trafficking’ aser ‘Missing persons’ ta asüba orentem ya mangashidangi liasü, kechiyong tsüraburtemi mulungsoa dang pei chirnurtem tangaleni aotsü atema melar, saka ibaji ajanga tsüraburtemi memeteti ‘Human trafficking’ nung shilem agi. Ano, agent kari maongka agia, tanurtem zübazüba anir aoer aser parnok kilitsü atema tangar dang yokdoker.” ta Dr. Temsula-i ashi.
“Nisung shibelenba atema tongtipang alizüng kaji, teküp ayoktsü atema lir aser iba khuret ya alima nung nisung million 4.5 shi kati ajurur. Iba sülen, tanü putu nung alar ayuba aser nisung mang nungi shilemtem agizüka ayoktsü atema nisung shilebenba mapa inyaker. India nung nisung shibelenba inyakyim kanga lir aser North East nung iba mapa kanga bulua inyaker. Police data ajanga ashiba agi, Nagaland nung anogo pezü shia nisung ka samar aser samartem noklang nung shilem 83 ji arishi küm 18 teküpokpur,” ta laisa shisem.
Naga nungertemi nisung shibelenba inyakyim ya kanga junga metettsüla aser nokdangtsüla. Iba inyakyim ya asenok sobaliba ozüngtem ajanga mekoktettsü saka tanü putu nung ozüng amertemi ang inyaktettsü. Iba asoshi police kanga tongtipang aser Police, Child Rights agency tem, Labour Department, Social Welfare, Mental Health aser NGO temi yaritepa inyaktsüla, ta NSCW Chairperson-isa ashi.
Sentong nung One Stop Centre (OSC) Central Administrator, Vikereno-ia SAKHI, OSC scheme indang osang metetdaktsü.
SAKHI, OSC scheme ya Ministry of Women and Child Development-i Nirbhaya Fund ajanga teyari agüja lapoker. Item centre ajanga tetsür nem teyari agütsür aser Nagaland kübok Dimapur nung June 2016 aser Kohima nung December 2016 nung lapokogo, ta Vikereno-isa shisem.
Tanü agiba sentong nung mendenji NSCW Member, Asangla Chalong liasü, Chubasangla-i temoatsü meshia sarasadem aser BYE Sangtam Baptist Church Kohima-i ken ka aten.)