Nisung tali mamentsüla

Gari yanglurtemi kechi gari yangludir yangluaka nisung kwika tashi amentsüla aser khu taret seret kwishibo bendentettsü item ajakji tendanger külen government-i temelaba agütsür. Itemji gari alir aser amshirtem asoshi dang masü saka gari nung amenertem asoshia kanga tekümdangtsü temetettsütem asütsü. Item temetettsütemji shitak anidaka amshiba ajanga meteta aser memeteti gari lendongtem nungi kümzüktsü. Ibayongji tetsüng ana aketba gari nungi tenzüka tetsüng aika aketba nisung amenba aser khu abenba garitem tashi repranga azüoktsü asoshi Transport Authority ajanga inyaker. Asen lima nungbo aiben scooter nunga nisung asemsem pezüzü  tashia mener senzüba angur. Aji oda, auto rickshaw aser taxi garitem nunga gari anishisanga mesademtsüsa pa den mejeptepa mener senzüba angutsü. Iba amaji nübortem senzüba gari bus aser train nunga aiben tekolak tashi nung tuagi tsüngtepba mener jajaba angur. Ibaji dang masü saka ano khu abenba garitem nunga pei tashi dak alia khu talila abenba ajanga len tom nung timtem ajuruba aiben angur. Item ajakji gari yanglurtemi gari anishir aser gari nung senzürtem lendongi meidaktsütsü asoshi lateta yutsüba ashi mangai peisasa pei lendongi aitsü metsübu inyakba tamashi mapatem asütsü. Iba kasa maparen nung tang Dimapur nung auto rickshaw anirtemi government-i ashiba mangai nisung talila abentsü asoshi parnok temeten jembiba mapang lir. Ajisüaka, koba kuli agi südir süang auto rickshaw nung gari anisang den nisung asem dak tali amenbaji ozüng raksaba mapa asütsü. Koba ozüng südir süang, alima tesünep nung alitsü aser nisungtem lendong aser takoksa majurutsü atema latettsür, anungji tashi angatsüla. Atangji, sen aaba gari nung nisung talila bennüba kuliji temetet dang lir. Ibaji sen talila aanür. Aji oda, mapa inyakertemi sen talila aanübaji tajung aser tim dang, ajisüaka gari nung taküm agi tendanga sen tali aatsü merangbajibo tai dang nungi tuluba ozüng raksaba mapa ka asütsü. Sen aatsü ali aser amshir asünungji, auto rickshaw asüyonga, taxi aser bus asüyonga sen dalang meshitsüla saka tamenertem dang nungi sen dalang meshiba den ano nisunga talila bendi süra ibajibosa alimela rongsen arishiba mapa ka asütsü. Atangji, yimti ka nung auto aser taxi ama senzüba ajanga tanishirtem sen aaba dang masü saka nübortem anisüngzüker aser yimti topur jungdaktsür. Ibaji angateta, yimti nung senzüba garitem ajak temerük aser topur tajung asütsüla aser gari ashirtema awashi temetet asütsüla. Kenü India nunger kaket zülur nüngtugu ka Singapore-i ao. Pa yangji taxi ka nung mener senzü. Iba mapang taxi anishisangi pa nem meter nungi adokba sen dang nungi tajemba agi. Ibayongji, pai taxi anishisang dangji kechiba sen ajema agir ta süngmanga asüngdang, idangji taxi anishisang jagi langzü, ‘ni iba kiyong lenmang junga memetetba agi na lenmang talangbalen nungi anir aruogo, anungji taidokang aser senji lenmang shitakbalen nungi aruba taa asütsü.’ Idakji asenok tangatettsü aser tagitsü lesson tajung aika lir. Iba jagi Singapore nung taxi anishisangji makoksar saka meteta aser memeteti pai Singapore nung alirtem aser Singapore yimti topur jungdaktsür. Iba mulungjang aser iba awashiji asenok Naga nunger auto, taxi aser bus anishirtem dak alitsüla. Tanübo tia majung, Dimapur nung auto rickshaw anishir teimbaka tsümartem dang lir. Ibayongji, parnoki asen lima topur ajungtsü atema kanga shishiabo mebilemer südi. Ashi, auto rickshaw ajunga ya Naga nungertemi awashi meteta amshi nungbo Naga nunger aser Naga lima koda topur jungla aser Naga nunger kwika ayongayonga anogo nung sen meyirijang kabo aatetla. Ibaji memetetba agi mesüra meinyaknüba agi tsümar kar ket nungbo auto rickshaw ter metsü yur, iba jagi kibong ayongayonga mesüa takar küma alir aser asenokbo mapa maka timatemer. Tanü asen lima nungbo auto rickshaw aser taxi anishirtem teimbaka tsümar aser tamenertem rongnung  public-jibo yutsür police dena auto rickshaw tejaklen tanishisang den mener ozüng raksar asü, benshiar mejangja senzüba angutsü ! Asenok asoshi temelenshi nüngdakba tesemji aji ka asütsü.