Nisung tepsetba ken o nung aija alisang tasüba agi merenshitsü akhang

Aizwal, Aenjeti 10 (Agencies): Aizawl nung Republic Veng neighbourhood Joint action committee puri tanü menei arishiküm 39 tain Laltlanchhuaha nem tasüba temerenshi agütsütsü asoshi khangogo. Pa ya 2015 küm Aenjeti 9 nü kibong ka nungi nisung 5 tepsetba dak sendakba nung aija lir.
Republic Veng tesem nung iba ya ataloker küm ana ajungba nü, joint action committee puri parnoki taoba mapang nung iba nisungba ya tasüba agi merenshitsü asoshi akhangba nung masetshi nokdaka lir, ta metetdaktsü. Joint action committee nung ya local council aser NGO tongtibangtem ajak densema lir.
“Nisung pongu tashi tepsetba ya onok mulung nung tang tashi mamai lir. Iba tatalokba ataloker küm ana ajungba mapang nung iba tatalokba ajanga onok minpronger. Onoki iba tatalokba kodanga mamadoktsü,” ta JAC sangdong ka ajanga metetdaktsü.
Laltlanchhuaha-i mit nung Sangliansiama’er kinunger pongu tashi kotari agi tsüngset aser par kibong nungi timba ka tepset. Sangliansiama’er jabaso shiba iba mapang nung kidang meliasü aser ki mapa nung yaritepa alir ka dang kümzük. Iba tatalokba sülen anogo ishika dang lir Republic Veng, JAC puri iba ken o nung aija alisang parnok aliba tesem nungi mindok.
JAC puri tanü ashiba agi, parnoki Laltlanchhuaha parnok aliba tesem nung tetsüng majemokdaktsütsü. Pa tasümang dena par kidangi bener arutsü asoshi memelatsü. Iba nisung tepsetba ken o ya Mizoram nung kodanga matalokdangba ken o ka lir aser aija alisang ya tang Aizawl Central Jail nung puoka lir.