Nisung tepseter nem tim temerenshi agütsütsü atema akhanger: CTMT

Mokokchung, June 08 (TYO): Brihostibarnü Chungtiatsür Telongjem Mokokchung Town (CTMT)-i sangdong ka ajanga, asür Moarenla Chungtia sür shisabulu aser mangyim tia nung aliba mapang nung nübu, rongsen, khuret aser shisatsü tajung agi kija aser lokti tentet balalai nungita yariba atema ajak dang pelar, aser ibaji sensotsüri kodanga mamatoktsü, ta metetdaktsü.
Ano iba ken o nung maneni tatembang obendang mangu tashi yariteptsü nüngdaker, ta CTMT Tir, Punaremla aser Secretary, Pangimenla nati kasa sangdong ajanga ashi.
Asür Moarenla Chungtia, kinungbu, Mr. Lolenwati Chuchuyimpang nunger shibai tashiyim aser meimchir mulungsentsü nungi shiruru kümer pei kinungtsü June 2, 2017 nü tepsetogo, iba ya tim masüba, alima aser nisung tsüngdang tesempatsü mapa, koba meimchiri atakatemtsü aser tapet temerenshi agütsütsü tim, aji agüjang ta ayimdenba ola yoker, ta sangdong nungsa shia lir.
Mr. Lolenwati shiba tang sorkar obendangba aser kuli tebushidak lir, ochi obendangba aser nisung tepseter ka atema koba temerenshi ozüng lateta lir, iba kasa obendangba agüjang, ibaji ozü takhangba, ta parnokisa metetdaktsü.
“Post mortem report aser asüba osang asür, Moarenlar kinunger dangi shiokba kulitem angadangra, iba tesempatsü mapa ya Mr. Lolenwati kisüngi inyakba masü ta angateter. Anungji, parnokjia tekaratiba nung bushia kasa temerenshi agütsütsü akhanger,” ta sandong nungsa metetdaktsü.
Mr. Lolenwati, shiba tang sorkar tepuokdak lir, pa anizüktsü atema shirnoki merangdir mesüra merangdar, ya magizüktsü aser mechioktsü akangakanga metetdaktsür. Tashi mangai pa nem obendang magütsüi anizüka kasa keno dak sentakba nung timtem kar danga adokra tagizüker khuret asütsü, ta sangdong ajangasa shisem.