Nisunger tebilemba

Khristan taküm ka nung tai ser nung shitak mesükba lenmang aika lir. Iba jagi Apijemtsü 14:12 nung ashir, “nisung tsüngdang shitak mesükba lenmang ka lir saka iba tatembangji tasüba.” Laishiba nung asenok asoshi tekümdangtsü aika shia aliba rongnung kangasa tekümdangtsü tulutibaji iba shitakba mesükba lenmangji asütsü. Atangji, Tsüngremi nisung nem shitak aser tai metettsü aser reprangtettsü tashi ka agüja lir, anungji aikati metetsümongabo meshitakba lenmangi maor. Aji oda, meshitak ser nung shitak angutsüsa reprangtetdaktsüba aser angatetdaktsübaji temenen satani dang inyaker. Ibaji yi jemer lenmang shitakbaang meshitak aser meshitakba lenmangang shitak mesüka anguba amai asütsü. Iba jagi aiben gari lendong ajurur. Iba amaji asen tanüla taküm nunga meshitak ser nung shitak ama bilema inyaknütsüsa aiben tatidang ajurutsü. Yisu alima nung Pa mapa tenzüka maodang, satani Pa atidangba mapatem reprangdangra item ajak to nisung tsüngdangbo shitak asütsü amai dang bilemtsüsa atidangba angur. Anogo lir nü aser lir aonung lumir külen kanga yaseta alidang, ain aketba nisung ka dang nisung kari long agi amtsük kümdakjang ta asüngdangba o ji kanga nüngdakba mapang ka nung melamelaa inyaktsüba mapa ka liasü. Iba kasaji tashi aketba nisung ka dang chuba yimli ajunga agütsütsü asoshi satan mapa tsüngdang ken apudaktsübaji melamelar aser taginütsüka liasü. Satani Yisu atidangbaji tanü tensa asenok atidanger asübo, mapai ai-maika manger sangwa nung takar kümer alitsüba ‘chance’ tajung ka aser election nung melamelaa adoker yimsüsür akümtsüba tasa aser tashi tuluka angur süla. Ajisüaka, alima nung chiyongtsü kija agi mesüra sen kija agi taküm alir masü Tsüngrem tashi agidang taküm alir ta angatetbajiang shitakba lenmang asütsü. Aji oda, alima nung mapa tamajung ajak inyaktema inyaker tashiyim agi MLA aser minister akümbaji nisung tsüngdangbo shitak mesükba lenmang saka nisung asoshi meshitak lenmang tamajungtibaji ibaji asütsü. Aiben asenoki Tsüngrem asoshi langka tajung inyakba agi shitakba lenmangi aor amai bilemer. Aji oda, sentep nung shilem agiba agi, tenla agütsüba agi mesüra temeim mapa tera inyakba agi asenoki Tsüngrem peladaktsür amai bilemer. Ajisüaka, tenyartem mapang Ananias aser Sapphira nati inyakba bilemdangra, tenati Tsüngrem nem tenla agütsübaji shitak mesükba lenmang liasü saka tatembangjibo tasüba liasü. Aji oda, Tsüngremi asenoki kechi inyaker aser kwi agütsür ta asübaji masü saka asenoki koma inyaker aser kong nungi agütsür ta asübajiang azünger. 1 Samuel 16: 7nung ashir, “Nisungi tema repranger saka Kibubaibo temulungjang repranger.” Israel nunger asoshi Yeriko yimti temeket dang meketa senzür jangzü apu nung yimti jara laotsübaji tamakoktsü liasü saka lao aser parnoki Yeriko yimti atsüngtet. Aji oda, nisungibo nisung tenük agi anguba dak amanger. Ibayongji, Israel madak chuba akümtsü asoshia Jesse’er chirtem rongnung asoajen tajung aser tambulen purtem dak dang nisungi tenük agibo temulung lemteta liasü saka Tsüngremibo tanubusang arem nung sannüka alisang tila tanur David dakang temulung lemteta liasü. Ashiko, tanü asen lima yimtenren nung kangshiba ya asenoki asen nük dang ajungba shima-shima inyakba agi asütsüa akok. Nisung tsüngdangbo tashi tait, asoajen tajung, nübener, takar aser tulurtem dang tajungba ta bilemer. Ibayongji, aiben asenoki yimten, arogo aser lokti nung takar aser tulur apia shimer. Ajisüaka, ibaji Jesse-i par jabaso tambusangtem shimba amato asütsüa akok. Tanü asenoki yimten yimsüsürtem shimtsü asoshia sen akartem aser tashiyim inyaktettsü purtem bushir. Ibaji nisung tsüngdang shitak mesükba lenmangtem lir. Ajisüaka, asenok küm aika shitakba mesükba lenmangleni aodang takoksa, timtem aser tasüba ajurua aruba tanü tashi asenoki ajangshir. Asenoki shitak amai bilema anguba agi Tsüngremi mulungba ama bilema inyaktsübaji asenok ajak asoshi lendong lir. Kodangsa asenoki mapa ka inyakdir, aseni mulungba masü Tsüngremi mulungba asü masü ta sarasadema inyaktsübaji kanga tenüngdaktsü asütsü.