Nisungtem sen nem kokdaktsür : APO

Kohima, January 9 (TYO) : Tesem aika nung nisungtem sen tashi nem kokdaktsür, ta Angami Public Organisation (APO) President, Vilhusa Seleyi-i ashi.
Kohima nung Hombarnü AYO-i mokdangba sentong takok ngua agiba sülen osangbener den sensaksemdang APO president-isa ashiba agi, “tanü takok tulu ngua inyakba mapa ya tanüngba kintemia ajizüka inyaktsüla, kechiyong lungkak aitba sentong magidang, kin ajak renema liasü saka tesem aika nung nisungtem sen nem kokdaktsü.”
Chief Minister T.R Zeliang aser pa den külemi inyakertem den yashi senden amenba atema osangbenertemi asüngdangdang, “onok tangatetba khenyongi balala lir, kechiyong parnoki (sorkar yimsüsürtem) parnok menden kümzüka ayutsü atema bilemer saka onokibo Naga nunger kümzüktsü aser Naga nunger tenzüktsü atema lir” ta APO President, Vilhusa-i langzüa liasü.
Dimapur district kübok Angami nunger kari tenüng agüja aliba atema ashiba agi, “Angami nunger ajaki tenüng agüja aliba candidate temi telongjem aser tashi angaba angateta, APO indang tetuyuba aser telemtetba sülen anidaktsü imlar.”
Angami Youth Organization (AYO)-ia sangdong ka ajanga mokdangba sentong nung shilem agir ajak dang pelaba metetdaktsüogo.
Tesüiba anogo 10 tema KVYO-i mapa jenti inyaka aruba atema parnok dang kanga pelar, ta AYO President, Neinguvoto Krose aser Vice President, Peter Rutsa nati sangdong nung shia lir.