NIT Meghalaya nung Hindu kürakyanglu ayuba magizüker

Shillong, September 27 (Agencies): National Institute of Technology (NIT) Meghalaya nung tamangba yimsü indang kürakyanglu ayuba atema Jaintia Students’ Union (JSU) Shillong Circle-i ashishiteper.
Iba onük atema JSU-i NIT Meghalaya dangi shidi ka züluogo aser iba nung Lord Ganesha indang kürakyanglu ka yua aliba agientsü shia lir.
Iba kürakyangluji Hombarnü NIT Meghalaya indang director’er secretariat kishizüng nung ayu.
Hindu nunger tsüngrem indang kürakyanglu ka ayuba ajanga NIT nung tanga tamangba yimsü balala nungi kaketshirtem temulung yirutsütsü ta JSU-i shidi nung shia lir.
Tamangba yimsü dak sendakba kürakyanglu masü saka ketdangsertemi shisaliok tsütsü mongin nisung kar indang kürakyanglutem ayuba tajungba, ta JSU-i NIT Director dang ashi.
India nung NIT 30 lapoka aliba nung NIT Meghalaya ya ka lir. Iba reju ya NIT Act 2007 (Amended 2012) kübok lapok.