Niti Aayog-i 2024 nungi LS & Assembly elections külemi aginür

New Delhi, April 30 (Agencies): 2024 nungi Lok Sabha aser assembly elections kasa mapang nung shilem ana lemsar agitsüla ta Niti Aayog-i tebilemba metetdaktsüogo.
Election atema nüboyimba maparen inyakba ajanga sorkar ketdangsübaren nung timtem majurutsü atema parnoki iba tebilemba abener.
Niti Aayog-i ashiba agi, iba tebilemba ya mapa küma inyakra state assembly kar khen atema sota ayutsü mesüra mapang talila apuloktsütsüsa akümtsü.
Iba tebilemba ya Election Commission-i shisadangtsü aser elections mapang ka nung külemi agitsü atema inyakyim latettsü atema telok ka tentettsü atema Niti Aayog-isa parnok dang shiogo.
Iba dak sendakba osang ka taruba ita trok tsüngda renemtsü aser tatembangba telemtetba ka sangküm March ita tashi nung renemtsü, ta 2017-18 nungi 2019-20 draft three-year action agenda nung shia lir.
Iba draft report ya April 23 nü Niti Aayog nung Governing Council züngsem ajak nem agütsüogo. Iba Council nung state ajak nungi chief minister tem dena lir.
President Pranab Mukherjee aser Prime Minister Narendra Modi nati Lok Sabha aser assembly elections külemi agi nung ajungtsü ta jembiyonga arur aser Niti Aayog-i iba tebilemba benokba ajanga tenati jembia aruba onük mapa akümer.
“India nung elections mapang ‘campaign-mode’ ajanga sorkar ketdangsübaren nung timtem majurutsü atema elections ajak mapang ka nungdang agitsüla. 2024 nungi mapang ka nung election shilem ana lemsar agitsü atema asenoki sentong atongtsüla” ta Niti Aayog draft report nung shia lir.