Nitin Gadkari-i Arunachal nung lenmang atema senotsü tali agütsütsü nangzük

Itanagar, January 15, 2017 (Agencies): Honibarnü Union minister for road transport and highways Nitin Gadkari Arunachal Pradesh nung ano lenmang yanglutsü asoshi sen crore 50,000 agütsütsü nangzük. Iba nung India aser China na international arrtsü nung aliba highway kilometer 1841 densema lir.
Arunachal nung lenmang yanglutsü asoshi sen agi anünga malitsü, ta Gadkari Arunachal nung mezüngbuba four-lane highway dena highway 4 lapoktsüdang ashi. Item lenmang tem sen crore 935 indoka yanglutsü asoshi agütsüogo.
“Sen crore 50,000 indoka yanglutsü aliba lenmangtem ajak center nung government kümsük küm 5 matemdangsa renemtsü,” ta Gadkari-i ashi. Maneni state government-i lenmang 4 yanglutsü atema sen meshiba dang nung talila crore 50,000 agütsütsü ta pai nangzük.
Honibarnü Itanagar nung kilometer 20 four-lane highway Gadkari lapoktsü.Iba lenmang ya sen crore 476 indoka yanglu aser iba ajanga Itanagar aser Holongi na sendaktepdaktsütsü. Iba lenmang ajanga maneni Itanagar aser Guwahati na tsüngda lenmang dang aliba dang nungi tasazük kilometer 60 agi tajemba kümdaktsütsü.
NH-713A kübok aliba two-lane highway koba tasazük nung kilometer 50 lir, iba lenmang densema pai lapoktsü. Sen crore 460 indoka iba lenmang yanglu.
Four-lane highway Itanagar nungi Banderdewa tashi koba NH-415 kübok lir, iba lenmang ya 2017 March nungi tenzüka yanglutsü, ta Union minister-i metetdaktsü. Iba lenmang ya tasazük nung kilometer 31.50 lir. Mezüngbuba kilometer 12, Itanagar nungi Naharlagun tashi atema sen crore 284 agütsüogo.
Arunachal government-i item mapa ajak tashishitsü melii ochishia inyaktsü, ta Chief minister Pema Khandu iba sentong nung jembidang ashi. Central government-i tamang kateta iba teyari agütsüba ajanga parnoki Arunachal ajungkettsütsü merangba sayur, ta paisa ashi.