Nitish-a sen shibangba anemer rongnung adentsü:Lalu

Patna, December 20 (Agencies): Mongulbarnü Rashtriya Janata Dal (RJD) tekolakba Lalu Prasad-i, Bihar Chief Minister Nitish Kumar-a kü den demonetisation anema nokdaker rongnung adentsü, ta ashi.
“Nitish Kümar-a onok den sen nokdangba anema longkak aitsü,” ta Patna nung Lalu Prasad-i osangbenertem dang ashi.
November 8, 2016 nü sen 500 aser 1000 senpaktem nokdangba sülen Nitish-a parnok den dena lir ta asüba osang ya Lalu-i tang mezüng metetdaktsür.
“December 28, 2016 nü district headquarters nung Rashtriya Janata Dal party-i demonetisation anema longkak aittsü aser iba sülen sangküm küm tetenzüklen Patna nungsa rally tulu ka akatsü,” ta tesüiba mapang Bihar chief minister, Lalu Prasad-i metetdaktsü.
Janata Dal telen nung tekoklakba, Nitish Kumar-ia sen tejenba nokdangba pusema liasü aser ibaji ajanga RJD aser Congress na prong kanga akseta liasü.
“Nitish Kumar-i kü dang anogo 50 lir külen sen nokdangba ajanga timtem adokba asadangtsü aser iba mapang ngutetba dak ajemdaker centre nem telangzüba agütsütsü shiogo,” ta Lalu-i ashi.
Taoba mapang Ato Kilonser-i China nunger company, Paytm yimjak nung ajungketba atema Lalu-i Modi aitsüogo.
“China nunger company ka yimjak nung ajungkettsüba India nunger tesüiba Ato Kilonser ka tanga lir mali?” ta Lalu-i tweet asü.
Paytm indang stake shilem 40 tashi China nunger company Alibaba indang lir aser Paytm ya sen tejenbatem shibangtsüba sülen nüburtemi kanga bulua amshiteper.