Nitish-i Police dang taoba mapang yi shishilembartem mittsü tuyu

Patna, November 26 (Agencies): Honibarnü Bihar Chief Minister, Nitish Kumar-i police dang taoba mapang yi shishilembartem mita aotsü aser maneni yi shishilembartem aputsü tuyuogo.
Prohibition Day sentong nung jembidang pai police tongti ketdangserem dang kodaser ozüng alema maneni yi angur ibaji kuliji bushiang, aser officers in-charge shirnoki yi maneni shishilembar putetdir taruba küm 10 tashi posting meyoktsü, ta metetdaktsü.
State nung yi meshimeshia nokdangaka kidanger states- Jharkhand, Uttar Pradesh, West Bengal aser Nepal nungi dang masü saka pilar aliba state Haryana nungia dena state telungi ozüng alema yi bener aitba mapang ka nung Chief minister-i item tetuyuba agütsüogo.
Haryana nungia dena ozüng alema state telungi yi bener aruba bushisüngdangtsü atema police nem mapa lemzüktsür, ta Chief Minister-i ashi.
Iba senden nung Additional Director General of Police (Headquarter), Sunil Kumar, Law & Order Aditional Directir General of Police, Alok Raj, Excise & Prohibition Minister, Abdul Jalil Mastan, Chief Secretary Anjani Kumar Singh aser Principal Secretary of Excise & Prohibition Amir Subhani nungera liasü.
“Tanga lenmang bushia alirtem nem sempet agujang (tamalen yi shishilembartem) aser sen aatsü atema tang tashi ozüng alema yi maneni shishilembartem puang,” ta Kumar-i ashi.