Nitish-i yi nokdangbaji yimtenren hadir ka ama amshir: Raghubar

Patna (Bihar), July 23 (Agencies):  Tanü Jharkhand Chief Minister, Raghubar Das-i Bihar Chief minister, Nitish Kumar aija, Kumar-i yi nokdangbaji tanga party tem anema yimtenren hadir ka ama amshir, ta aitsü.
Tanü yangi sentong ka nung jembidang Bihar den kidanger state, Jharkhand Chief minister-i, “Bihar nung yi nokdangbaji tanga kecha masü saka saya ka mesüka lir, aser Nitish Kumar-i ibaji  yimtenren hadir ka ama amshir,” ta ashi.
Raghubar-i ashiba agi, Bihar nung yi nokdangba sülen ozüng alema West Bengal nungi yi jenti Bihar-i shibelener, ajisüaka Nitish Kumar-i Mamata Banerjee (Bengal Chief Minister) dang lar state nung yi nokdangtsü atema masüngdanger.
Raghubar Das-isa, “Kumar-i BJP-i yimsüsüba state tem sema senzür aser Ato kilonser, Narendra Modi dang item state nung yi nokdangang ta ashir, ajisüaka pai kechiba West Bengal aser Nepal nabo mesemdanger, kechiyong Bihar nujng yi nokdangba sülen item tesem nungi ozüng alema yi jenti shibelener,” ta ashi.
Tesülen Patna nung pa nüngtem nung ayongba sentong ka nung pa aden.
Iba sentong nung senior Bihar BJP lenir, Sushil Kumar Modi, opposition lenir, Prem Kumar aser state party tongti, Mangal Pandey nungera dena liasü.
Das-isa, Bihar nung yi nokdangba sülen state nung ozüng alema ganja achiba shilem 25 agi teimba kümogo, ta ashi.