Nitish Kumar Bihar CM tenangzükba agiogo

Patna, November 20 (Agencies): Hokolbar nü Patna, Gandhi Madian nung Janata Dal-United lenir, Nitish Kumar pongubenbuba Bihar Chief Minister menden atema tenangzükba agiogo.

Tawa agiba Bihar assembly election nung JD-(U)- RJD tongti Lalu Prasad den lokteper BJP-i aniba NDA madak takok tulu ngua liasü.

State Angh, Ram Nath Kovind-i ketdangsüa Nitish-i Hindi oshi nung CM office atema Tsüngrem tenüng nung tenangzükba agi. Lalu Prasad’er jabaso ana- Tejashwi Yadav aser Tej Pratap Yadav nata minister menden atema tenangzükba agiogo.

Tejashwi bo Bihar deputy chief minister asütsü.

Lalu Prasad’er jabaso ana Bihar yimtenren nung ajemoka tenangzükba agiba sentong nung Lalu den kinüngtsü aser taoba chief minister Rabri Devi aser jala Misa Bharti nungera denogo.

BJP nung madenba party temi tashi sayua iba sentong nung linük nung opposition lenirtem aika denogo. Parnok rongnung taoba mapang Ato kilonser HD Deve Gowda, Delhi chief minister Arvind Kejriwal, West Bengal CM Mamata Banerjee, Assam CM Tarun Gogoi aser Himachal CM Virbhadra Singh nunger dena liasü.

Iba dak sentakba nung JD(U) state Tir, Vashisht Narain Singh-i, “Iba ama ya kodanga matalokdang. Iba ya linük nung opposition party tem longjemba tetenzüker lir,” ta ashi.

Bihar assembly election nung BJP atema sashia nüboyimtsüsang Ato kilonser Narendra Modi bo iba sentong nung medentet ajisüaka sorkar tenüng nung Union minister M Venkaiah Naidu aden.

2013 küm Lok Sabha election nung BJP Ato kilonser candidate atema Narendra Modi shimba ajanga Nitish-i par party küm 17 tashi BJP den teloktep aliba raksa.