Nitish Kumar-i Nagaland CMRF asoshi sen crore 1 tenlar

Dimapur, Rongjui (September) 29 (TYO): Janata Dal United, Nagaland president aser Northeast Executive Council (NEEC) Chairman Senchumo (NSN) Lotha-i Bihar Chief Minister aser Janata Dal United National President, Nitish Kumar den ajurutepa Nagaland nung alima lendong akanga takoksa anguba osang lemsatep.
Iba mapang Nitish Kumar-i Nagaland Chief Ministers Relief Fund (CMRF) nem sen crore 1 tenla agütsütsü nangzük, ta Media Cell, JD(U) Nagaland sangdong ka nung ashi.
Iba denji külemi, Nitish Kumar-i Nagaland Chief Minister Neiphiu Rio dangi shidi ka zülu aser iba nung pai Nagaland nung anentsüh aser tzümetsüng ajanga nisung taküm samatsüba aser teraksa jenti anguba atema temulung raksar aser jashir ta shia lir.
“Bihar nung alir ajak tenüng nung ni tasür kibongtem den asükhu lemsateper” ta Nitish-i ashi.
“Tzümetsüng mapang takoksa aser timtem ajurubaji Bihar nung alirtemi kanga junga meteta lir. Anentsüh aser tzümetsüng lendong atalokba tesemtem nung yariteptsü atema ni Chief Minister Relief Fund, Bihar nungi tenla tera bener yoker” ta Nitish-isa shidi nung shia lir.
“Nü lenisüba kübok Nagaland nung alirtemi iba timtem mapang ajangtettsü imlar” ta paisa shisem.