Nitish Kumar-i opposition-i shimba tatong Tir candidate pusemtsü

New Delhi, July 12 (Agencies): JD(U) lenir aser Bihar Chief Minister, Nitish Kumar-i BJP-i aniba NDA sorkari shimba Tir candidate, Ram Nath Kovind ang pusemtsü sangdonga liasü, ajisüaka Congress tatong Tir, Rahul Gandhi-i JD(U) lenir dang Congress-i aniba opposition tatong Tir candidate, Gopalkrishna Gandhi pusemtsü mepishiba pai agizükogo.
Osang angazükba agi, yashi opposition party tem senden mena linük tatong Tir candidate shimba sülen Rahul-i Bihar Chief Minister ajurua liasü.
Yashi senden nung opposition party temi tatong Tir candidate atema Mahatma Gandhi’er semchir, Gopalkrishna shim.
Rahul-i phone ajanga Nitish Kumar dang opposition candidate pusemtsü asüngdanga liasü.
Yashi opposition party 18 iba senden nung aden aser Janata Dal United nungia Sharad Yadav dena liasü.
Iba senden nung tongtibang nisungtem rongnung Congress Tir, Sonia Gandhi, taoba Ato kilonser, Manmohan Singh, TMC lenir, Derek O’ Brien, CPI(M) lenir, Sitaram Yechury, National Conference lenir, Omar Abdullah, Samajwadi party lenir, Naresh Agarwal aser BSP lenir, Satish Chandra Mishra nunger liasü.
2007 August ita nungi Hamid Ansari tatong Tir inyaka arur. 2012 küm August 11 nung iba menden kümzük anabenbuba abentsü atema pa shima liasü.
Linük tatong Tir election ya August 5, 2017 nü agitsü aser kasa anogo nikongdang vote azüngtsü.