Nitish Kumar-i private sector nung reservation aginür

Patna, November 6 (Agencies): Hombar nü Bihar Chief Minister Nitish Kumar-i private sector nung reservation alitsüla ta ashi aser iba onük atema linük jenjang nung oi atsüteptsüla ta paisa shisem.
“Linük nung private sector nunga reservation nüngdaker. Iba onük atema linük jenjang nung o atsüteptsüla” ta pai osangbener senden ka nung ashi.
Taoba hopta Bihar Cabinet-i tanga teloktem nem sorkar mapa agüja alibatem reservation kübok züngoktsü atema tebilemba ka shidanga liasü.
Nitish-i private sector nung reservation alitsü indang onük ya tang mezüng jembir masü. Yaküm April 9 nunga pai reservation quota akhangba dang masü saka iba inyakyim ya private sector nunga tenzüktsüla ta ashi.
Taoba mapanga by Union Minister Ram Vilas Paswan-i aniba Lok Janshakti Party-ia private sector nung job reservation alitsüla ta takhangba agüja liasü.
Taküm Karnataka Chief Minister Siddaramaiah-ia private sector nung reservation policy tenzüktsü atema ken o ka benok.
Ajisüaka, industry telok aikati reservations inyakyim benokba ajanga tetsükdaktsü ajurutsü ta ashi.
Skilled labour peria maliba ajanga private sector nung terenlok malitsü aser tangartemi industry tem nung senotsü meyutettsü, ta parnokisa shisem.
Iba onük atema NITI Aayog vice chairman, Rajiv Kumar-ia taküm October ita, “private sector nung reservation policy tenzüktsü tebilembaji nibo magizüker” ta metetdakja liasü.
Private sector nung job reservation malitsüla saka sorkar mapa tasentem adokdaktsütsüla. Küm nung lanur lakh 60 shi mapa inyaktsü tenzüker saka sorkari lanur lakh 10-12 nem mapa agütsütsüla, ta Kumar-i metetdaktsü.
India nung shisaliok rejutem aser sorkar mapatem asoshi Scheduled Castes (SCs), Scheduled Tribes (STs), Other Backward Class (OBCs) aser physically handicapped nisungtem nem shilem mekazüka yutsür.