Nitish Kumar-i Rahul Gandhi ajuru

New Delhi, July 22 (Agencies): Bihar nung ‘Grand Alliance’ ta ajaba teloktep anokshidar ta osang prokba mapang ka nung tanü New Delhi nung JDU lenir aser Bihar Chief Minister, Nitish Kumar-i Congress Party tatong Tir, Rahul Gandhi ajurua tang Bihar nung yimtenren tensa indang lemsatep, ta osang ka ajanga metetdaktsü.
Bihar sorkar teloktep nung JDU, RJD aser Congress party tem lir.
Party osang ajanga ashiba agi, tanü Nitish Kumar New Delhi nung Rahul Gandhi’er kidangi ao, aser iba mapang nung lenir anati Bihar Deputy Chief Minister aser RJD chief Lalu Prasdad’er jabaso, Tejashwi Yadav anema ochimashi ken o nung benoka aliba indang lemsatep.
Ato kilonser, Narendra Modi-i Tir menden nungi anisüngzüktsü alisang, Pranab Mukherjee nüngtem nung sentong ka ayongzüka lir, aser iba sentong nung adentsü atema Nitish Kumar tang New Delhi-i oa lir.
Bihar nung opposition BJP-i Tejashwi anema ochimashi ken o benoka aliba ajanga Bihar nung JD(U), RJD aser Congress teloktep anokshiba mapang ka nung lenir ana ajurutepogo.
RJD tongti, Lalu Prasad-ibo par jabaso Tejashwi Deputy Chief Minister menden nungi aludaktsütsü akhangba anema nokdaker, ajisüaka Kumar-ibo pai ochimashi anema inyakba mapatem nung ajemdaker Tejashwi Deputy CM menden nungi aludaktsüner, ta osang angazüker.
Kumar-i aniba JD(U)-i BJP-i aniba NDA Tir candidate, Ram Nath Kovind ang pusemtsü sangdongba ajanga linük nung opposition party temi pa dang mepelar.
Ano tanga osang ka ajanga ashiba agi, tanü JD(U) Tir, Nitish Kumar-i Congress lenir, Rahul Gandhi dang, Congress-i tarak keta aliba Lalu Prasad’er kibong pusemba anentsüla, ta shiogo.
Tawa Tejaswi Yadav-i Chief Minister Kumar-i ayongba sentong ka nung madenba sülen yashi Kumar o Tejaswi na ajurua senden ka mena liasü, ta osang angazüker.